Christiansborg
Sume pillugu filmi Borgenimi takutinneqassaaq
Kalaallit rockimik nipilersortartut pillugu filmi Folketingimi ilaasortanut takutinneqassaaq
Folketingimi ataatsimiittarfik februaarip tallimaani filmertarfittut atorneqassaaq. Tassani 'Sume - mumisitsinerup nipaa' Folketingimi ilaasortanut takutinneqassalluni.
Filmi Inuk Silis Høeghimit aamma Emile Hertling Péronardimit suliarineqartuuvoq.
Folketingimi Kalaallit Nunaat pillugu ataatsimiititaliaata Folketingimi ilaasortaqatitik qaaqqussavaat. Filmi takutinneqareerpat oqallittoqassaaq. Filmip takutinneqarnerani Inuk Silis Høegh aamma Emile Hertling Péronard peqataassapput. Filmi naammassippat Naalagaaffeqatigiinneq pillugu eqqartuisoqassaaq. Kalaallit Nunaat pillugu ataatsimiititaliaata siulittaasuata Johan Lund Olsenip Inuit Ataqatigiinneersup aamma Nick Nielsensip Siumumeersup eqqartuineq aallarnissavaat, tassani filmimik isiginnaartut tamarmik oqalliseqataasinnaapput.
Piviusulersaarusiaq ukioq kingulleq takutinneqaqqaartoq, Imagine Native filmfestivalimi marloriarluni nersorniarneqarpoq oktobarimi. Filmfestivalimi Berlinalemi 65-issaanni ingerlanneqartussami Berlinimiittumi aamma takutinneqarumaarpoq.