Sulorartartut VM-eriarnissamut piareerput

Sulorarnermi nunanut allanut unammisartut Danmarkimut aallassapput ullumi marlunngornermi, Kinaliassallutik aqagu pingasunngornermi. Tassani iligiiaarluni nunarsuarmi pissartanngorniunneq ingerlanneqassaaq.

Macao aamma Kazakhstan Kalaallit Nunaata unammissavai. Kenya aamma unammisussaanikuugaluarpaat, peqataasinnaanatilli nalunaarsimapput. Unammersuaarneq aallartinneqassaaq sapaatiuppat, maajip 26-ata tungaanut ingerlassalluni.

Unammersuaarneq aatsaat taama angitigisoq

Nunanut allanut unammisartut Frederik Elsner aamma Milka Brønlund Sermitsiaq.AG-mit oqaloqatigineqarput.

- VM-imi peqataarngaalerpunga, taamatullu periarfissinneqarnera nuannaarutigeqaara. Ukioq manna sungiusarsuaarnikuuvugut, Kalaallit Nunaat sinnerlugu peqataalernera tulluusimaarutigaara, Frederik Elsner oqarpoq.

Island Gamesini aamma EM-ertoqarnerani ukioq kingulleq peqataasareerpoq.

- Kisianni una peqataaffissara anginersaavoq. Unammisartut allat pikkorissut unamminissaat qilanaarnarpoq, nalunngilarali ajornaatsuinnaassanngitsoq. Kisianni pisinnaasakka tamaasa atorlugit sukataassaanga.

- Unamminerni ajugaanissaq anguniagaavoq, sukataarumaarpunga. Angalanissamut piareeqqavunga, Frederik Elsner oqarpoq.

Unamminerit ataasiakkaarlugit

Milka Brønlund 21-nik ukioqarpoq, GUX-imi timersornermik sammivilimmik ilinniagaqartuuvoq.

- Pissanganaallannartarpoq eqqarsaatigalugu peqataanissaq. Qilanaaraluttuinnarpunga, angalanissarput takorluumisaalereerlugu. Unammisaqattaarnerit aallartinnissaat pissanganarnerpaavoq, neriuppunga unammereerutta unamminerni tulliuttuni pissusissamisut unammisinnaassallunga, Ilulissani inunngorlunilu peroriartortoq oqarpoq.

- VM-imi peqataaninni qanoq naatsorsuuteqarpit?

- Soorunami takutitsilluarusuppunga. Soorunami ajugaarusuppunga, kisianni ilisimavara unammisartunut pikkorissunut unammisussaalluta, taamaattumik imminut pakatsisikkusunngilanga ajorsaraluaruttaluunniit. Unamminerit ataasiakkaarlugit unammeqattaassaanga imminut naatsorsuuteqarfigerujussuarnanga, kisianni soorunami angusaqarluarusuppunga, Milka Brønlund oqaluttuarpoq.

Aggustimili sungiusangaatsiarsimalluni oqaluttuarpoq.

- Sapaatip akunneranut sisamariarluta sungiusartarpugut, saniatigut arpattarlunga nukkassartarlungalu. Suli inuusoqigama pitsaanerulersinnaallunga nalunngilara, neriuppungalu siunissami assinganik angalaqqinnissamut periarfissinneqaqqissallunga, oqarpoq.

Unamminerit avataanni misigisaqarnissaq aamma qilanaaraa.

- Siullerpaamik Kinalialerpunga, taamaammat pissangagivara inooriaasaat piorsarsimassusaallu takussallugit, nunanut allanut unammisartoq oqarpoq.