Sulorartartut sungiusaasuat: Unammisartut ineriartornikorujussuupput

Kalaallit sulorarlutik nunanut allanut unammisartui Gotlandimi Island Gamesimut peqataasussat, aqagu sisamanngornermi Danmarkimut aallassapput.

Svenskit qeqertaannut aallannginnerminni tassani sungiusassapput.

Sungiusarneq Aarhusimi ingerlanneqassaaq.

Angutini unammisartut uku ilaassapput: Jens-Frederik Nielsen, Bror Madsen, Frederik Elsner, Sequssuna Fleischer Schmidt kiisalu Toke Ketwa-Driefer.

Arnanilu uku: Sara Lindskov Jacobsen, Malu Degn, Milka Brønland, Paninnguaq Davidsen aamma Pilunnguaq Hegelund.

Unamminerit assoroornartut
- GM-imi pingasoriarluni kuultinnattoq, Jens-Frederik Nielsen, Island Gamesimi ataasiakkaarluni unamminerni malinnaaffigissallugu pissanganarpoq. Sara Lindskov Jacobsen aamma qanoq angusaqassanersoq pissanganarpoq, sungiusaasoq Rune Svenningsen Sermitsiaq.AG-mut oqarpoq.

Jens-Frederik Nielsenip aamma Bror Madsenip angutit marlukkaarneranni kuultinnannikuunertik illersortussaavaat.

- Qanoq ingerlasoqarumaarnersoq takujumaarparput. Kingullermitut pitsaatigisumik ingerlasoqarnissaa neriuutigaarput, kisianni qularnaatsuunngilaq. Iluatsissappat assigiinngitsorpassuit iluatsinneqartariaqarput, taanna oqarpoq.

Siuariangaatsiartut
Kisianni unammisartut ineriartornerat sungiusaasup naammagisimaarpaa.

- Ulluinnarni unammisartut qanimut attaveqatigisarpakka. Unammisartut tamarmik annertuumik alloriarsimasut isumaqarpunga. Tamarmik timikkut teknikkikkullu sungiusarnikkut siuariarput. Unammisartut kingullermik Island Gamesertoqarneranit pitsaanerupput.

- Kisianni aamma unammisassagut taamaapput. Taamaammat Island Gamesimi ujaminnassinnaanissarput nalileruminnaappoq. Kisianni unammiuaarneq naammassippat ujaminnassimanissarput takorloorparput, kisianni tamanna qulakkeerneqanngilaq.

Ujaminnassanngikkussi pakatsissavit?
- Unammisartut unammiuaarnermi pitsaanerpaamik unammippata, taamaakkaluartorlu ujaminnanngitsoorlutik, taava pakatsissanngilanga. Kisianni unammisartut pitsaassusertik eqqorunikku, imaluunniit pitsaassusertik atunngikkunikku pakatsissaanga, Rune Svenningsen oqarpoq.

Iligiikkaarluni unamminermi unammisartut Falklandsøerne, Isle of Man kiisalu Isle of Wight unammissavaat.

- Isle of Manip pulje ajugaaffiginissaanut ilimagineqartuupput. Kisianni ullugissaarfimmi ajugaaffigisinnaagigut isumaqarpunga. Kisianni taakku ilimagineqarput, assoroornassappullu, Rune Svenningsen oqarpoq.