Sulorartartoq: Pitsaanerpaanngorniarluni Japanimi sungiusartoq

21-nik ukiulik sulorartartoq Toke Ketwa-Driefer nunarsuup illuatungaaniippoq - tassani Kalaallit Nunaanni sulorallaqqinnerpaanngorniarluni anguniagaqarnini aalluppaa.

Japanip kippasinnerusortaani illoqarfissuarmi Kyoto-miippoq. Nuna 125 millionit missaanik inoqarpoq, tassani nunarsuarmi sulorallaqqinnerpaat ilaat inuupput. Soorlu maanna nunarsuarmi pitsaanerpaaq Kento Momota Japanimeersuusoq. Nunarsuarmi pissartaasartut arlaqartut aamma Japaniuupput. Toke Ketwa-Driefer maanna Japanimiippoq, tassani qaammatini pingasuni sulorarnermik sungiusassalluni.

- Doshisha Universitymi ulluinnarni sulorartarpunga, atuarfik 30.000-nik atuartoqarpoq, Kyotop kujataani inissisimalluni. Sulorallaqqissorsuarnik unammisartoqarput, Japanimi universititeqarfiusuni pitsaanerit ilaanniillutik. Universititemi pitsaanerit sungiusaqatigisarpakka sapaatip akunneranut sisamariarlunga, Toke Ketwa-Driefer Sermitsiaq.AG-mut oqarpoq.

Sungiusamit allarluinnarmik inooriaaseqarneq

Timersornerup tungaatigut ingerlatsineq sungiusimasaminit allaanerujussuusoq oqaluttuaraa.

- Maani 'timersoqatigiiffeqanngilaq'. Atuarfinni timersornerit ingerlanneqartarput, meeqqat atuarfianit universititep tungaanut taamatut ingerlanneqarluni. Universitetimi timersortaraanni assigiinnarpaa soorlu Danmarkimi Kalaallit Nunaanniluunniit timersoqatigiiffinni pitsaanerpaani unammisartuulluni. Taassuma saniatigut Nara University High Schoolimi sapaatip akunneranut marloriarlunga sungiusaqataasarpunga. Timersornerup saniatigut asimiittarpunga, maani pinngortitaq kusanaqaaq, tassani ilaatigut arpattarlunga, 21-nik ukiulik sulorartartoq oqaluttuarpoq.

Sulorarnermi sungiusarneq aamma sungiusimasaminit allaanerusoq oqarpoq.

- Sivisunerusumik maani sungiusartarput - soorlu akunnerni pingasunit sisamat tikillugit. Nunatsinni akunnerni marlunni sungiusartoqarnerusarpoq. Intervallit sivisunerusut aamma maani atugaapput. Assersuutigalugu Nunatsinni sungiusarnerni intervallit to minutsit qaanginngisaannarpaat, maani minutsini qulini intervallertoqartarpoq.

- Tamanna sungiunniassallugu imaannaanngilaq. Sungiusaqataanikka siulliit marluk timersornerup tungaatigut misiginikuusanni sakkortunersaapput, taamaattumik nuanneqaaq tamanna misigalugu. Aamma sungiusimasannit allaanerusumik unammeriaaseqartut sungiusaqatigalugit pissarsiaqarnaqaaq, tamanna sulorartarninnut ineriartuutaalluarpoq, Toke Ketwa-Driefer oqaluttuarpoq.

Pitsaanerpaanngornissamut anguniagaq

- Sooruna Japan toqqarpiuk?

- Japan sulorarnerup tungaatigut siuarsimasorujussuuvoq, Nunarsuarmi pitsaanerpaat arlaqartut maanimiuupput. Taamaammat maanga sungiusariarnissara toqqarpara. Aamma kalaallimit japaniumiumillu kingoqqisuusumik aappaqarpunga, taanna Japanimi ilaqutaqarpoq, taakkunani najugaqarluta. Taamaattumik sungiusarluarnissamut periarfissaqarluarpunga, akivoq.

Japanimut sungiusariarpoq Kalaallit Nunaanni sulorarnermik pitsaanerpaanngorniarluni.

- Kingullermik GM-ertoqarmat inersimasuni pingasoriarlunga bronzinnappunga. Tamanna tulluusimaarutigaara, kisianni tamanna uannut naammanngilaq. Maaneereeruma pissartanngorniarlunga siunniuppara, tamannalu tikinnissaa qanilliartortoq malugaara. Aamma nunanut allanut unammiartoqattaartarusuppunga, timersuut Nunatsinni ineriartorteqataaffigalugulu, Toke Ketwa-Driefer oqaluttuarpoq.

Pitsaanerulissasoq

Toke Ketwa-Drieferip unammisartutut pitsaanerulernissani anguniarlugu Japanimut sungiusariarnera nunanut allanut unammisartunut sungiusaasup Rune Svenningsenip nuannaarutigaa.

- Pitsaanerulernissaq anguniarlugu ineriartorumasunik unammisartoqarluni tulluusimaarnaqaaq. Sulorarnerup tungaatigut pitsaanerulernissaa qularnanngilluinnarpoq. Unammisartutut pitsaaneruliinnarnani aamma misilittakkat tungaatigut pissarsiaqarluassaqaaq. Toke sukkanerusumik unammeriaaseqalersimanissaa naatsorsuutigilluinnarpara, taanna saniatigut aalassarissusaa aamma saassussigaangami iliuutsit pitsaanerulerfigisimassagai ilimagilluinnarpara, Rune Svenningsen oqarpoq.

Toke Ketwa-Driefer Nunarput sinnerlugu nunanut allanut unammisartuuvoq, nunanat tamalaat unammiuaarneranni peqataasareerluni soorlu iligiiaarluni VM-imi Kinami ingerlanneqartumi, Ruslandimi EM-imi ukioq kingulleq aamma Island Gamesimi iligiiaarnermi kuultinnaqataalluni.