Sulorarnermi VM: Unammisartut sukataarluartut
Kalaallit Nunaat sinnerlugu sulorarnermi nunanut allanut unammisartut iligiiaarluni nunarsuarmi pissartanngorniuteqataanerminni unammineq kingulleq unammivaat. Unammisartut sukataarluarput, aamma Sara Lindskov Jacobsen unammisaminut ajugaavoq
Sulorarnermi iligiiaarluni nunarsuarmi pissartanngorniuttoqarpoq Kinami ulluni makkunani.
Kalaallit Nunaat peqataavoq, unammisartut Kazakhstanimut ullumi marlunngornermi unammipput.
Unamminermi siullermi arnat angutillu iligiiaarneranni unamminermi Toke Ketwa-Driefer aamma Milka Brønlund Kazakhstanermiunut Khaitmurat Kulmatovimut Oxsana Shtellemullu unammipput. Sætsimi siullermi kalaallit unammisaat 8-21-mik ajugaapput. Sætsilli aappaanni kalaallit takutitsilluarput, sukataarlutik, unammisaat kukkoqattaalersut. Sætsip aappaani kalaallit 21-17-mik ajugaapput. Sætsimili kingullermi unammisaat sukariaannarput, sukkanerusumik unammilerlutik, tassanilu kalaallit 8-21-mik ajorsarlutik.
Angutit ataasiakkaarlutik unammineranni Jens-Frederik Nielsen Dmitriy Panarin-imut unammivoq. Unammineq minutsini 30-ni sivisussuseqarpoq, Jens-Frederik Nielsen 21-14, 21-14-mik ajorsarluni.
Pissanganartumik unammineq
Arnat ataasiakkaarlutik unammineranni Sara Lindskov Jacobsen Aisha Zhumabek-imut unammivoq. Sætsi siulleq naligiiffioqaaq, Sara Lindskov Jacobsen sætsimi siullermi ajugaanissamut periarfissaqaraluarluni, taamaattoq 21-23-mik ajorsarluni. Sætsip aappaani Aisha Zhumabek aallartilluarnerugaluartoq qasulerpoq, Sara Lindskov Jacobsenip tamanna atorluarpaa. Sara Lindskov Jacobsenip qasujaanneruvoq, unammisaa kukkoqattaalersoq. Sætsip aappaani Sara Lindskov Jacobsen ajugaavoq 21-13-mik.
Sætsimi kingullermi unammisut naligiittorujussuupput. 18-18-eqqallutik Sara Lindskov Jacobsen periarnerit pingasut ajugaavai, taamaasilluni unamminermi ajugaalluni. Taamaasilluni Kalaallit Nunaat unammersuarnermi siullermeerluni ajugaalluni.
Iligiiaarlutik unamminerit unammissutigineqartuni tullinnguupput.
Unammineq pissanganartoq alla
Angutit iligiiaarlutik unammineranni kalaallit Frederik Elsner aamma Jens-Frederik Nielsen ajornartorsiungaatsiarput, unamminermut iserpianngittoorlutik. Kazakhstanermiut angutitaat 9-21-mik aamma 10-21-mik ajugaapput.
Unammineq kingulleq unammissutigineqarmat unammipput arnat iligiiaarlutik iligiit Sara Lindskov Jacobsen aamma Nina Høegh Møller. Kalaallit aallartilluarput, sætsimi siullermi 21-12-mik ajugaallutik. Sætsip aappaa pissanganarneruvoq naligiiffiunerullunilu. Unammisut allaat naligiikkaluarput tamarmik 18-eraarlutik. Uggornartumilli kalaallit ajorsaqqalaarput 19-21-mik.
Sætsimi kingullermi Kazakhstanermiut ajugaapput, taamaasilluni unamminermi aamma ajugaallutik.
Kalaallit VM-imi unammeqqissanngillat. Unammisaqattaarnerni marloriarlutik unammigamik tamarmik ajorsarpaat. Kenya aamma unammisussaanikuugaluarpaat, peqataasinnaanatilli nalunaareernerisa kingorna kalaallit unammeqqinngitsoorlutik.
Kalaallit marloriarlutik unamminermi ajorsarput, taamaasillutik VM-imi kingullersatut inissillutik.