Sulorarnermi EM: Unamminerni ajugaarusuppugut ajornaatsuinnaanavianngilarli

Sulorartartartut nunanut allanut unammisartui angutitaat europami iligiiaarluni pissartanngorniuteqataassapput sapaatip akunnerata tulliani. Kalaallit angutit sisamat Nunarput sinnerlugu peqataassapput

Sulorartartut Jens-Frederik Nielsen, Taatsiannguaq Pedersen, Toke Ketwa-Driefer kiisalu Sequssuna Fleischer Schmidt angutit iligiiaarlutik EM-imi unamminermi Kalaallit Nunaat sinnerlugu unammeqataassapput.

Tuluit Nunaat, Sverige aamma Estland unammissavaat.

- Unammersuaarnerni taamaattuni peqataanissara takorloortuaannarnikuuara, taamaattumik maanna paasiuminaalaarpoq maanna tassa peqataalerama. Kisianni unammeqataanissara qilanaareqaara - unammersuaarnermi pikkorissunut unammisartussaavugut, tamanna ineriartornitsinnut iluaqutaassasoq qularinngilara, Sequssuna Fleischer Schmidt Sermitsiaq.AG-mut oqarpoq.

Unammisartuullutik ullumi tallimanngornermi Danmarkimut aallarput.

Unammiffiit angisuut

Iceland Internationalimi unammisoqarnerani peqataavoq - taamaattooq aatsaat taama unammiuaarnerni angitigisumi EM-imi peqataanissaaq.

- Sungiusarluarnikooqaagut. Frankrigimi unammiffigisassarput pissanganalaarpoq, Inussivimmit pingasoriaammik angineruvoq, tamannalu unamminitsinnut malunnassaaq. Godthåbhallenimi aamma Inussivimmi unammeriaatsikka assigiinneq ajorput. Frankrigimi tamanna allaanerussaqaaq - unammiffitsinni anoreqartassaaq, taamaattumik imaassinnaasoq arsaaraq sivisunerusumik silaannarmiittassasoq - tamannalu misilittagaqarfigiivinngilara, 27-nik ukiulik sulorartartoq oqaluttuarpoq.

Sequssuna Fleicher Schmidt

- Unamminermiluunniit ataatsimi ajugaaqataasinnaasuuguma nuannissagaluaqaaq, tamanna EM-ertoqarnerani kingullermi takuarput, tassani Jens-Frederik aamma Toke ajugaapput. Englandimut ajugaanissatsinnut neriuuteqanngilagut, taamaattoq Sverigemut aamma Estlandimut periarfissaqarsinnaavugut - taamaattorli ajornaatsuinnaanavianngilaq unamminissagut, oqarpoq.

Siuariartuutaasartoq

- Nunanut allanut unammisartut nuani allani unammeqataareerlutik uteraangamik unammigaangatsigit pitsaanerulersimasartut malugisuaannarparput. Taktikkikkut siuariartoqarsimasarnera malunnartaqaaq - tamanna sulissutigisarsimagaat malunnartarpoq. EM-eqataanissannut qilanaarinersaavara inuussutissarsiutigalugu unammisartut unammisut isiginnaarnissaat, Sequssuna Fleischer Schmidt oqarpoq.

21-nik ukiulik Toke Ketwa-Driefer Japanimi sulorarnermik sungiusariarpoq ukioq kingulleq. Pingajussaa unammersuaarnernut angisuunut peqataalerpoq, siornatigut EM-eqataasareerpoq kiisalu ukioq kingulleq VM-eqataalluni.

- Japanimiinnera ilinniutiginikooqaara, atuarfinni universiteteqarfinnilu assigiinngitsorpassuarni unammisarlutalu sungiusartarluta. Aamma nuna takornariarluarpara misigisaqarluarlunga, oqarpoq.

Sulorarnermik ineriartorneq

- Japanimi sakkortoorujussuarmik sungiusartoqartarpoq. Sungiusariaasaat sivisunerujussuupput sakkortoorujussuusarlutik, akunnerni sisamani sungiusartarput, maani akunnerni marlunni sungiusartarluta. Sungiusarnerni sungiusariaatsit aamma marloriaammik sungiusarneqartarput - taamaattumik ilikkagaqartorujussuunikuuvunga. Ineriartorluarpunga, aamma sulorarnerup tungaatigut eqqarsartaasera allanngornikuuvoq. Sakkortunerusumik sungiusarnissara piareersimaffiginerulernikuuara aamma unammeriaatsinni sukkanerusumik unammisarnissara angunialernikuullugu, Toke Ketwa-Driefer oqaluttuarpoq.

Toke Ketwa-Driefer

Nuummut angerlareernermi kingorna ilaatigut sungiusaasuusalerpoq.

- Japanimiinninni ilikkakkakka sungiusaatigisarpakka. Ilikkakkakka klubbimut B-67-imut utertillugillusooq maanna sungiusaasarpunga, timersoqatigiiffimmut iluaqutaaniassammat. Sungiusaasarnikka tigulluarneqarnikuupput - sungiusakkakka tamarmik nutaanik misileraanissamut ammapput.

Marlunngorpat unammissapput

Frankrigimi unammisaqattaarnissanut qilanaarpoq.

- Unammilluaqattaarnissarput naatsorsuutigaara. Ajugaasussatut naatsorsuutigineqanngilagut, taamaattoq takutitsilluarusuppugut. Kingullermik peqataagatta ataaseriarluta ajugaavugut, neriuppugut soorunami assinganik angusaqarsinnaassalluta, kisianni Kalaallit Nunaat sinnerlugu takutitsilluarnissarput pingaartinnerpaavarput.

- Sulorarnermik soqutigisaqarluartuugama unammersuaarnissanut qilanaaqaanga. Unammiffik nutaaq, unammisassat nutaat qilanaaraakka. Unammisaqattaarnernut taamaattunut peqataanissamut sungiusarluartarpunga, peqataanissamut periarfissinneqarnera nuannaarutigeqaara. Peqataanitsinni aamma angusinnaasagut annertunerulersissinnaavagut, Toke Ketwa-Driefer oqarpoq.

Tuluit Nunaat unammeqqaassavaat marlunngorpat, pingasunngorpat Sverigemut unammissallutik kiisalu naggamik Estland unammissallugu.

Powered by Labrador CMS