Sulorarneq: Kalaallit VM-imi unamminermi siullermi ajorsartut

Sulorarnermi nunanut allanut unammisartut iligiiaarluni nunarsuarmi pissartanngorniunnermi Kalaallit Nunaat peqataavoq, unammersuaarnerit illoqarfissuarmi Kinami Nanningimi ingerlanneqarpoq.

Kalaallit unammisartut tallimariarlutik unamminerminni sukataarluaraluarput, unamminitilli tamarmik ajorsarfigaat. Unammissutigineqartut tassapput, ataasiakkaarluni arnani angutinilu unammineq, iligiiaarluni arnani angutinilu unammineq kiisalu arnat angutillu akuleriillutik unamminerat ataaseq.

Frederik Elsner aamma Nina Høegh Chi Lang Kuanimut aamma Ng Chi Chong-imut unammeqqaarput. Tassani 21-15, 21-15-imik ajorsarput.

Ataasiakkaarluni unamminerni Jens-Frederik Nielsen unammeqqaarpoq, tassani Fong Puimut unammilluni. Unamminermi 21-10, 21-9-mik ajorsarpoq. Sara Lindskov Jacobsen ataasiakkaarluni unamminermini aamma ajorsarpoq, 21-13, 21-12-mik.

Unammineq pissanganartoq
Angutit iligiiaarlutik unammineranni Jens-Frederik Nielsen aamma Frederik Elsner ajugaanissamut periarfissaqaraluarput. Sætsimi siullermi ajorsareerlutik sætsip aappaani kalaallit ajugaapput 21-19-imik. Sætsimili kingullermi ajorsarput 21-17-mik.

Arnat iligiiaarlutik unammipput unamminermi kingullermi. Tassani Nina Høegh aamma Sara Lindskov Jacobsen 21-12, 21-2-mik ajorsarput Tue Xin Gongimut Weng Chi Ng-imullu.

Kalaallit Nunaat ataasiaqqilluni unammeqqissaaq, tassani marlunngorpat Kazakhstanimut unammissallutik.