Sulorarneq: EM-imut peqataalernera oqaluttuarisaanermut ilannguttoq
Nunatsinni sulorartartuni pitsaanerpaaq EM-eqataassaaq. Taanna GM-ertoqariitsiarnerani ingerlanneqassaaq
Jens-Frederik Nielsen nunani allani unammisarnermigut angusarissaarluartarnini tunngavigalugu ataasiakkaarluni EM-imi peqataassaaq. EM Kiev-imi Ukrainemi ingerlanneqassaaq apriilip 21-anit 26-at ilanngullugu.
Sulorartartut Europami kattuffissuanni inatsisitigut allannguisoqareerneratigut kalaallini siullersaalluni taamatut annguttuuvoq.
- Peqataanissannut anngussimallunga nalunaarfigineqarpunga sapaatit akunneri marluk qaangiummata. Taamaattoqarnissaa naatsorsuutiginngilluinnaraluarpara, toqqaannartumik peqataanissarami naatsorsuutiginikuunngikkaluarpara, nunatsinni sisamariarluni pissartaasareersoq Sermitsiaq.AG-mut oqarpoq.
Unamminerni ajugaanissaq
Jens-Frederik Nielsen, maanna Europami pitsaanerit 187-it akornaniittoq, makitsilluarnissani neriuutigaa.
- Unammilluarsinnaasannik makitsinissara neriuutigaara. Pitsaanerimmi unammissagaluarukkit nuannerpallaarnavianngilaq. Taamaattoq unammilluarusuppunga, taannalu pingaarnerpaavoq, oqarpoq.
Paamiuni poorskikkunni GM-ertoqassaaq, taassani unammeqataareeruni Ukrainemut unammiartussaaq.