Sullorsuaq qaqqakkut aqquserniornermit 40 procentimik akikinneruvoq
Siorarsiorfiup tungaanut sullorsualiornissaq suliarinnittussarsiuunneqangajalerpoq. Sullorsualiornissaq aalajangiunneqarsimavoq, kommuni naapertorlugu qaqqap sinaatigut aqquserniornermut sanilliullugu akikinerungaatsiartussaammat.
Ingerlatseqatigiiffik illoqarfimmik inerisaasussaq Nuuk City Developæment siorna misissuisussanngorlugu suliakkinneqarsimavoq, tassa Nuummi illoqarfiup immikkoortortassaata Siorarsiorfiup tungaanut aqquserniortoqassappat, aaqqiissutissamik pitsaanerpaamik misissuisussanngortinneqarsimavoq.
Siorarsiorfik illoqarfiit pingaarnersaanni ineqarfiit annertuut ilassaraat, taassumalu tungaanut sullorsualiortoqasssanersoq imaluunniit qaqqaq Ukkusissat sinerlugu aqquserniortoqassanersoq aalajangiiffineqartussaalluni.
Kommuneqarfik Sermersuumi kommunalbestyrelsi sapaatip akunnerani matumani aalajangerpoq, sullorsualiornissaq aaqqiissutissaasoq, taanna piaarnerpaamik suliarinnittussarsiuunneqassaaq.
Kommuni naapertorlugu aaqqiissutissatut taanna toqqarneqarsimavoq, qaqqaq sinerlugu aqquserniornermut sanilliullugu 40 procentit missaannik akikinnerusussaammat.
Pisuinnaat biilillu aqqutaat immikkoortinneqassasut
Kommuni nittartakkani aqqutigalugu allappoq, Siorarsiorfimmut aqqusineq nutaaq 1.500 meterinik takissuseqassaaq, taakkununngalu ilaalluni sullorsuaq 1 kilometerinik takissuseqartoq. Biilinut aqqutit marluk immikkut 3,5 meterinik silissuseqassapput taavalu cykelertunut pisuinnarnullu aqqut 3,5 meterimik silissuseqassaaq. Pisuinnaat aqqutaat biilertullu aqqutaasa akornanni betonimik assersorneqarsimasuussaaq.
- Sullorsuup angallattunut tamanut toqqissisimanartuunissaa uannut pingaaruteqarpoq. Illoqarfiup immikkoortua nutaaq biileqanngitsunuttaaq najugaqarfigissallugu pitsaasuussaaq, Kommuneqarfik Sermersuumi borgmesteri Charlotte Ludvigsen (IA) oqarpoq.
Taanna isumaqarpoq, sanaartorneq alloriarnerusoq angisooq:
- Nuummi inissialiornissanut inuussutissarsiutillu sumiiffissaannut nunaminertat amigaatigineqarput. Siorarsiorfiup tungaanut sullorsualiornissaq suliffeqarfinnik amerlanerusunik inuillu amerlanerusut initaarnissaannik kinguneqassaaq, Charlotte Ludvigsen oqarpoq.
Kommunimit naatsorsuutiginqarpoq, sullorsuaq aqquserniornerlu ukiut pingasut qaangiuppata naammassineqarsimassasut.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...