Sullorsuaq pillugu suliassaq ukiunik arlalinnik kinguartinneqartoq
Nuummiittumi Nuussuarmi sullorsuup allilerlugulu iluarsaanneqarneqarnera 2029-mi aatsaat naammassineqartussatut maanna naatsorsuutigineqalerpoq. Kommunalbestyrelsip tassunga taarsiullugu timmisartoqarfissap tungaanut aqqusinissaq salliutinniarpaa.
Kommuneqarfik Sermersuumi aningaasaqarneq eqqarsaatigalugu kommunalbestyrelsi aalajangersimavoq, Nuummiittumi Nuussuarmi sullorsuup allilerneqarnissaa ukiunik arlalinnik kinguartinniarlugu.
Missingersuutissat isumaqatigiissutigineqarnerannut atatillugu aalajangiisoqarpoq, missingersuutissat kommunalbestyrelsimi partiinit tamanit pingasunngornermi isumaqatigiissutigineqarput.
Politikkerit isumaqatigiissumminni allapput, sullorsuaq pillugu suliassaq 2029-mi aatsaat naammassisassanngorlugu kinguartinneqassasoq. Kommunimit siusinnerusukkut ilisimatitsissutigineqarnikuuvoq, sullorsuup iluarsaallugulu allilerneqarnissaa 2024-mi naammassineqartussatut naatsorsuutigineqartoq.
Politikkerit tassunga taarsiullugu timmisartoqarfissap tungaanut aqqusinernup allilerlugu suliarineqarnissaa maanna sallliutinniarpaat.
Tamatuma saniatigut Siorarsiorfiup tungaanut sullorsualiassatut pilersaarutaasoq Nuussuarmi sullorsuup suliarineqarnissaanit siulliunneqassaaq.
Isertitaqarnerulersitsissasoq
Sullorsuassaq taanna 2027-mi atuleriaannanngorlugu suliarineqarsimassaaq. Politikkerit naapertorlugit Nuummi suliffeqarfinnut inissialiortiternissanullu nunaminertassat qulakkeerneqarnissaannut sullorsuassaq pingaaruteqartoq.
- Taamaalilluni nunaminertassat atugassiissutigineqarsinnaalissapput akileraarutinillu isertitaqarnerulernissaq naatsorsuutigineqarsinnaalissaaq, taakkulu kommunip ineriartorteqqinneqarnissaanut aningaasaliissutaasinnaassapput, politikkerit isumaqatigiissummi allapput.
Aviisip Sermitsiaq oktobarip aallartinnerani oqaluttuaraa, Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfiup suliniutit avatangiisinut sunniutigisinnaasaasa misissorneqarsinnaanersut pillugu naliliisoqarnissaanik kissaateqarsimanera pissutigalugu sullorsuit taakku marluk suliarineqarnissaat kinguartinneqarsimasoq.
Pilersaarutaasimagaluarpoq, suliassat taakku marluk oktobarip ingerlanerani suliarinnittussarsiuunneqassasut, suliassaq ukiup nikinnerani aallatinneqarsinnaaqqullugu, tamannali maanna pisussaajunnaarpoq. Nuuk City Developmentimi pisortaq Jens B. Frederiksen ilisimatitsivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...