Kalaallit Nunaanni sullivimmi avatangiisit pillugit inatsit annertunerpaartaatigut qallunaat inatsisaannut assiguvoq, taamaattorli 2005-ip kingorna nutarterneqarsimanani.

Kalaallit Nunaanni sullivimmi avatangiisit pillugit inatsisip ullumikkut pissutsinut naleqqussarneqarneratigut Kalaallit Nunaanni pissutsit immikkut ittut isiginiarneqarsimapput, soorlu piniarneq, aalisarneq aatsitassarsiornerlu. Sullivinnik nakkutilliisoqarfik tusagassiuutinut nalunaarummi taama allappoq.

Tamakku saniatigut inatsisip allanngortinneqarnera ilaatigut makkunatigut pivoq:

• Sullivimmi tarnikkut avatangiisit eqqumaffigineqarnerunissaat
• Suliffeqarfiit sullivimmi avatangiisit pillugit inatsimmik unioqqutitsisut anginerusumik akiligassinneqartarnissaat, tamanna pisuni immikkut sakkortuuni pisimasoqartillugu
• Suliffeqarfinnut sullivimmi nalilersuisarnerit (APV) pillugit sakkortunerusumik piumasaqarfigineqarneri
• Maleruagassat nutarterneqarput suliffeqarfiit suleqatiginnittussaatitaanerannut pineqartillugit isumannaallisaaneq aamma peqqinnissaq

Inatsimmik allannguineq Folketingimi amerlanerussuteqartunit akuersissutigineqarpoq, atuutilissallunilu 1. juli 2023.

Tunngavissamik qulakkeerinnittoq

IA-mi folketingimut ilaasortaq, Aaja Chemnitz, siorna suliassaqarfimmik sakkortuumik isornartorsiuivoq, Kalaallit Nunaannilu ullutsinnut naleqqutinngitsuunerarpaa.

Suliffissaqartitsiniarnermut ministeri Ane Halsboe-Jørgensen oqarpoq:

- Inatsisip allanngortinneratigut tunngavissaqarlualerpoq Kalaallit Nunaanni sullivimmi avatangiisit isumannaatsumik peqqinnissakkullu suliniarfigeqqinneqarnissaat. Inatsisip allanngortinneratigut Kalaallit Nunaanni sulisartut illersugaanerulerput, ullutsinni suliffeqarfinni pissutsinut naapertuunnerusumik, soorunami Kalaallit Nunaanni pissutsit immikkut ittuusinnaanerat isigiumallugu.