Sullitat: Assartueqatigiittalerneq pitsanngoriaatinik kinguneqanngitsoq
Royal Arctic Linemit sullinneqartartut Eimskipimikassartueqateqartalernermi pitsanngoriaatiniktakujuminaatsitsipput.
Royal Arctic Linemit sullinneqartartut ingerlatseqatigiiffiup imaatigut assartuinermi periaatsimut nutaamut aamma Eimskipimik suleqateqalernera kiffartuussinermi pitsanngoriaatinik annerusunik misigisaqarfiginngilaat. Taamaattorli kingusinnerusukkut pitsanngoriartoqarsinnaassasoq, Arctic Groupimi pisortaq Thomas Hjort naliliivoq.
– Aaqqissuussineq nutaaq iluamik atunngilarput. Periarfissaqaraluarpugut, suliffeqarfittummi Kalaallit Nunaannik, Savalimmiunik aamma Islandimik niueqateqartaratta, nassuerutigisariaqarparpulli soorlu Danmarkimik niueqateqarunnaarluta Islandimik niueqateqartalissagutta akit naammaginartumik pilerinassuseqanngimmata. Tassa ataqatigiissitsinissaq aallaqqaammut immaqa neriuutigisimasaraluarput maannamut angusinnaasimanngilarput. Imaalluarsinnaavoq akit kingusinnerusukkut allannguuteqartut, taamaalillunilu nioqqutissanik USA-mit Islandi aqqusaarlugu Kalaallit Nunaannut tikisitsisalernissaq imminut akilersinnaalissalluni, Thomas Hjort Sermitsiamut oqarpoq.
Arctic Importimit oqaatigineqartut naapertorlugit nioqqutissamik Aarhusimit aamma Aalborgimit Nuummut nassiussinerup Reykjavikimit Nuummut nassiussineq akeqatigaa. Tamatuma saniatigut nioqqutissanik amerlasuunik USA-mit Danmarkimut tikisitsisarneq aamma Kalaallit Nunaannut ingerlatitseqqittarneq akikinneruvoq, nioqqutissanik ikittuinnarnik USA-mit Islandimut aamma Kalaallit Nunaannut inniminniinissaq akisunerulluni.
Oqaluttuaq tamaat Sermitsiami sapaatip akunnerani matumani saqqummersumi atuarsinnaavat, ugguuna iserfigiuk: