Sullissiumatooq Kalaallit Nunaanni qinngasaaruttarneq akiorniarlugu peqatigiiffimmik aallartitsisoq

Erla Vintherip Nuummeersup qinngasaaruttarneq akiorniarlugu nuna tamakkerlugu peqatigiiffik ”Tamattaasa” aallartippaa.

Erla Vinthersip erngutaa qaammatini arlalinni sakkortuumik qinngasaarneqartarsimavoq. Erla Vintherillu qinngasaaruttarneq akiorniarlugu peqatigiiffik aallartippaa, anguniakkallu ilagaat atuarfinni qinngasaaruttarneq akiorniarlugu ulloqartitsisoqartalernissaa.

Nuummi sullissiumatuut ilaat Erla Vinther pingaartumik meeqqat atuarfiini qinngasaarisoqartarnera akiorniarlugu peqatigiiffimmik aallartitsivoq.

Kalaallit Nunaanni atuarfeqarfinnilu qinngasaaruttarneq akiorniarlugu ulloqartitsisoqartalernissaa anguniakkatta siullersaraat. Ajunngitsumik ataatsimoorsinnaalersitsineq qaammarsaaneq, meeqqani inuusuttuni, atuartitsisuni angajoqqaani inuiaqatigiinnilu qinngasaaruttarneq pillugu ilisimasanik nutaanik aqqutissiuiniarpugut.

Peqatigiiffimmit nutaamit tusagassiorfitsigut nalunaaruteqarluni taamatut ilisimatitsissuteqartoqarpoq.

Erla Vinther siulittaasunngorpoq:

- Meerartatsinnut inuusuttortatsinnullu ajunngitsumik ikiuisinnaannginnerput imminullu
inissaqatissinnaannginnerput isumassuisinnaannginnerpullu ilumoorsinnaanngilaq. Timikkut sakkortusaarfigineqarneq sakkortuumik qinngasaarneqarneq inersimasunittaaq
qaammaterpassuarni ernuttamma misigaa, Erla Vinther oqarpoq, nangillunilu:

- Peqatigiiffimmi qinngasaaruttarneq pillugu ilisimasanik attaveqaatinillu annertuunik peqarpugut. Qinngasaaruttarneq akiorniarlugu suleriusissarput ilisimatuussutsikkut misissuinerit, suliniutit nunani allani ingerlanneqarsimasut, nunatsinnilu ilisimaneqartut atorlugit sulissaagut. Qinngasaaruttarnerup pissusaa inuiaqatigiinnut qaammarsaassutigineqarnissaa iliuuseqarfigineqarnissaalu pingaaruteqarpoq, Erla Vinther oqarpoq.

Kikkut tamarmik qinngasaaruttarneq pillugu oqaluttuassaqartut

Peqatigiiffimmit oqaatigineqarpoq, inuiaqatigiinni kikkut tamarmik qinngasaaruttarneq pillugu oqaluttuassaqartut. Qinngasaarisutut, qinngasaarneqartutut, isiginnaartutullu. Peqatigiiffimmi oqaaseqartartunngortoq Christina Hardenberg pilersitsiniarluni julip 18-ani ataatsimeersuartoqarmat taamatut oqarpoq.

- Kuummut nakkarsimasut iliuuseqarfiginagit isiginnaaginnarutsigit qinngasaarunnerup
silarsuaaneeqataalersimassaagut. Nakkarsimasulli qummut qaqiinnassanngilagut. Kuup ingerlaarfia qummut alakkartariaqarparput nakkartarnerisa peqqutaat paasiumallugu. Kuummullu nakkartinneqarsimagunik sooq nakkartinneqartarnersut paasiniartariaqarparput, Christina Hardenberg nassuiaavoq.

Peqatigiiffiup pingaarnertut nunatsinni qinngasaaruttarneq pillugu naalagaaffiup iluani ilisimasat, naggueqatittalu ilisimasaat periusaallu atorlugit ilisimatusarnikkullu uppernarsarneqarnikut tunngavigalugit suliniuteqarnissaa siunertaavoq.

Naalakkersuisut aamma qinngasaarisarneq akiorniarlugu nuna tamakkerlugu periusissaq, Kalaallit Nunaanni sumiiffinni tamani ukiut tulliuttut pingasut ingerlaneranni atuutsinneqalertussaq saqqummiuteqqammerpaat.

Powered by Labrador CMS