Sullissisut aappariit nakuusertarnerat pillugu ilisimasanik amigaateqarput
Arnat aapparisamit nakuuserfigineqartillugit, sullissisut quliugaangata arfinillit arnanut pisooqataatitsisarput.
’Nammineq aamma pisuussutigilaarsimassavaa’. Arnanik aappaminnit nakuuserfigineqartartunik taamatut isiginnittariaaseq nerrivinnaani aamma kantiinani kisimi atuutinngilaq, kisianni aamma sullissisut akornanni annertuumik atugaavoq. Suliniutip Kattunnerup ilaqutariinni nakuusernermik eqqugaasunut sullissisut akornanni misissuinerata nutaap tamanna takutippaa.
Misissuinermi sullissisut quliusunit arfinillit oqaaseqaammut ’Arnat nakuuserfigineqarnermik nakuuserfigineqaraangamik pisooqataakkajuttarput’-mut tamakkiisumik imaluunniit ilaatigut isumaqataapput, taamaalillutillu nakuuserfigineqartoq pisooqataatillugu.
Nammineq oqarnerat naapertorlugu, sullissisut aamma aappariit nakuusertarnerat pillugu ilisimasanik annertuumik amigaateqarput.
Taakkunannga 56 procentit akissuteqarput, ilaqutariinni nakuuserfiusunik ikiusinnaanermi nammineerlutik aamma suleqatititik angerlarsimaffimmi nakuusertoqartarnera pillugu ilisimasanik amigaateqarlutik akissuteqarput, 79 procentiilu isumaqarput, ilaqutaariit nakuuserfiusut pillugit sullissiviit allat qanoq pitsaanerusumik suleqatigissanerlugit ilisimasanik annerusunik pisariaqartitsillutik.
- Angerlarsimaffimmi nakuusertoqarneranik paasinninnissamut sullissisut taakku pingaaruteqarput, kisianni nakuusertarneq pillugu ilisimasaqanngikkunik, suliassaq taanna kivikkuminaappoq. Apersuinermi immersugassaatitta takutippaa, sullissisut amerlasuut suliartik suliariumallugug nakuuserneq pillugu ilisimasanik ujartuisut, Kirsten Ørgaard, Mæklebøttecenterimi pisortaq taama tusagassiuutinut nalunaarummi oqarpoq, taanna Kattunnermut ilaavoq.
Atuartitsissutit nutaat
Kattunneq suliniut tassaavoq, isumaginninnermut naalakkersuiosoqarfiup ilaqutariinnut sullissiviit, Mary Fonden, Danner, Mælkebøttecentret aamma Oak Foundation Denmark peqatigalugit ingerlanneqartoq.
- Anglersimaffimmi nakuusertoqartarnera pillugu ataatsimut suliniutitsinni ilaqutariinnut sullissiviit pingaarutilimmik inissisimapput. Kattunnermi misilittakkat takutippaat, ilaqutariinnut sullissivinnit sulisunik ilinniarteqqinneqarnerisa suliamik ilisimasat annertunerulersikkaat. Kisianni ilaqutariinnut sullissiviit nukittunerusumik sullissillutik neqerooruteqarnissaannut periarfissaat suli pisariaqartinneqarpoq. Tamatuma saniatigut ilaqutariit nakuusernermik eqqugaasut pillugit suliaqartut akimut suleqatigiinneq misissortariaqarparput, kommunillu ilaqutariinnik sullissiniarnerminni unammillernartitaat. Apeqqutinik immersugassatigut misissuinerup nutaap tamanna naqissuserpaa, isumaginninnermut naalakkersuisoq, Martha Abelsen (S), tusagassiuutinut nalunaarummi taama oqarpoq.
Sapaatip-akunnerata tulliani Kattunnerup suliniummit misilittakkat pingaarutillit kommunit oqaloqatigalugit ataatsimiinnermi saqqummiutissavai, tamatumalu saniatigut angerlarsimaffimmi nakuusertarneq pillugu isumaginninnermut siunnersortitut ilinniarnermi atuartitsissutit nutaat saqqummiunneqassallutik.
- Isumaginninnermut siunnersortit aamma sullissisut allat atuartitsissutit qimerloorumaaraat neriuutigaarput, Kirsten Ørgaard Mælkebøttecentretimeersoq oqarpoq.
Suliniutip Kattunnerup ilaqutariinnut sullissiviit nukittorsarneqarnissaat pingaarnertut ukkataraa, aamma sulisut ilaqutariinni nakuuserfiusuni paaninnillutik sullinnissaannut ilinniarteqqinnissaat.