Sullissisoq nipangiussisussaatitaanerminik unioqqutitsisimasoq meeqqanut nunaqarfimmeersunut paarsisunngorsimasoq
Tasiilami siusinnerusukkut sullissisuusimasoq, inuit attaveqaqatigiittarfiisigut paasissutissanik allanut tusarliuteqqusaanngitsunik siammarterisimasoq, kommunimi suleqqilersimavoq. Maannakkut atuartut ineqarfianni meeqqanik nunaqarfimmeersunik paarsisutut sulilersimavoq.
- Siullertut kommunip tungaanit ataqqinninnginneruvoq. Aappaatut annilaarnarpoq, meeqqammi pillugit paasissutissat allanut tusarliuteqqusaanngitsut tamanut saqqummiunneqarsinnaanerat pissutigalugu.
Taamatut oqarpoq Naausunnguaq Ignatiussen Streymoy, taassuma panimmi kinguaassiuutitigut innarlerneqarsimanera pillugu kommunip isumaginnittoqarfiani suliami nipangiussisussaatitaanermik unioqqutitsisoqarsimaneq nammineerluni misigisimavaa.
Naasunnguaq Ignatiussen Streymoy Tasiilami inuttut ajornartorsiuteqarneq meeqqanullu kanngutsaattuliortarneq pillugu filmimi piviusulersaarummi, "Byen hvor børn forsvinder", peqataareersoq, sullissisoq suliaminut tunngassutilinnik saqqummiussisimavoq.
Kommuni iliuuseqarsinnaanngitsoq
Naasunnguaq Ignatiussen Streymoyp nammineq inuttut atugai pillugit sullissisoq inuit attaveqaqatigiittarfiisigut paasissutissanik saqqummiussisimammat taamanikkulli isornartorsiorsimavaa:
- Kommunimut ikioqqulluni saaffiginnissimaneq piinnarlugu tamanut saqqummiunneqarneq kusananngilaq, Naasunnguaaq taamanikkut Sermitsiaq.AG-mut oqarpoq.
Naasunnguaq Ignatiussen Streymoyp suliaq saqqummiunneqarmat, sullissisup nipangiussisussaatitaanerminik unioqqutitsisimanera pillugu kommuni saaffigisimavaa, oqarfigineqarsimallunili sulisoq kommuni suliunnaarsimammat iliuuseqarsinnaanatik.
Sullissisuusimasoq maanna atuartut ineqarfianni meeqqanut nunaqarfinneersunut inspektøritut atorfinitsinneqarsimavoq. Kommuni naapertorlugu atuartut ineqarfianni inspektøri, meeqqanut ilaquttatik qimallugit illoqarfinni anginerusuni atuartunut anaanatut ataatatullu atuuttuuvoq. Meeqqat angerlarsernertik, atuarfimmi ajornartorsiuteqarnertik inuttullu allatut unammilligassaqarnertik pillugu inspektøri saaffigisartussaavaat.
Tamanna Naasunnguaq Ignatiussen Streymoyp tupigusuutigaa.
- Misiginikuusarput eqqarsaatigalugu, paasisinnaanngilara inuup pineqartup kommunimi sulileqqissimanera, taanna oqarpoq.
Pinerluuteqarsimannginnermut uppernarsaatit pissarsiarineqartartut
Kommunimi atuarfeqarnermut ingerlatsivimmi pisortap Riikki Grønvoldip suliat ataasiakkaat oqaaseqarfigerusunngilai, ilisimatitsissutigaali sulisunik nutaanik atorfinitsitsisoqaraangat, pinerluuteqarsimannginnermut uppernarsaammik aamma meeqqanik innarliisimannginnermut uppernarsaammik ingerlatsivik pissarsisartoq.
Tamatuma saniatigut atorfinitsitsinermut ataatsimiititaliaq oqaaseqaatinik allanillu atorfinitsitsinermut pingaaruteqarsinnaasunik pissarsiniartarpoq.
- Atorfinitsitsinermut ataatsimiititaliaq inassuteqaateqartarpoq, uagullu atorfinitsitsinissaq akuersaartarlutigu, Riikki Grønvold Sermitsiaq.AG-mut oqarpoq.
Suliaq pineqartoq imaluunniit nipangiussisimasussaatitaanermik siusinnerusukkut unioqqutitsisimasumik atorfinitsitsinermi, innuttaasut inuttut atugaat pillugi paasissutissanik qulakkeerinninnissamut kommunip akisussaaffeqarnera pillugu apeqqummut taanna isummerusunngilaq.
Facebookikkut oqalliffimmit tigulaagaq. Sullissisuusimasoq allappoq piviusulersaarummi sallusoqartoq, ilaqutariimmi ikiorserneqarnissamik neqeroofigineqarsimammata. Atuisoq alla aperivoq, tamanna suminngaannit nalunnginneraa. Sullissisuusimasoq allappoq, tamanna suliaminit ilisimallugu.