Sullissisoq nipangiussisussaatitaanermik qaangiisimasutut eqqartuunneqartoq
Isumaginninnermi sullissisoq, DR-ip piviusulersaarusiaata "Byen hvor børn forsvinder" takutinneqarnerata kingorna nipangiussisussaatitaanermik unioqqutitsilluni Facebookikkut allassimasutut siorna unnerluunneqarpoq. Suliaq eqqartuussivimmi naammassineqaqqammerpoq. Sullissisoq pisuutinneqarpoq, Nunattali Eqqartuussivianut suliassanngortitseqqilluni.
Isumaginninnermi sullissisoq nipangiussisussaatitaanermik qaangiilluni nittartakkani attaveqatigiiffiusuni suliaq pillugu siorna allataqarsimasoq, tallimanngormat 19. februar Sermersuumi eqqartuunneqarpoq.
Pineqartoq paasissutissanik suliffimmi pisimasanik nipangiussisussaatitaanermik unioqqutitsisutut unnerluunneqarluni Sermersuup eqqartuussiviani eqqartuunneqarpoq.
Pinerluttulerinermi inatsimmi paragraf 50 imaappoq:
Atorfimmi paasisanik nipangiussisussaanermik unioqqutitsisutut eqqartuunneqassaaq kinaluunniit pisortani kiffartuummik imaluunniit suliamik suliaqarluni suliaqarsimalluniluunniit paasisanik isertuutassanik tamatumunnga atatillugu ilisimalersimasaminik taamaaliortussaanani allanut ingerlatitseqqiisoq imaluunniit atornerluisoq.
Suliaq pillugu
Suliami pineqarpoq isumaginninnermi sullissisoq Facebookimi allanneqarsimasumut 9. maj 2019-imi akissuteqarfiginnittoq. Facebookimi DR-ip piviusulersaarutaa "Byen hvor børn forsvinder" pillugu qisuariartoqarsimavoq. Piviusulersaarummi inuttat ilagaat Naasunnguaq Ignatiussen Streymoy ilaqutaalu. Immiussinerup nalaani Naasunnguup panini kinguaassiuutitigut kannguttaatsuliorfigineqarnerup kingorna ikiorneqarnissaanik ilungersuuteqarpoq.
Isumaginninnermi sullissisoq suliamut attuusimassuteqanngikkaluarpoq, oqaaseqarsimaninili pillugu kingorna politiinut nalunaarutigineqarluni.
Pisuutinneqarpoq
Sermersuup Eqqartuussiviani naqissuserneqarpoq unnerluutigineqartoq pisuuneranngikkaluarluni, taamaattoq Facebookimi allataqarsimanerarsimanera, taamatullu kukkusutut misigisimanera.
Suliami kommuni eqqartuussivimmut ilanngullugu nalunaaruteqarpoq, unnerluutigineqartup paasissutissat sulinerminut atatillugu pissarsiarisimassagai ilimanaateqartoq:
- Kommunimi direktørip allakkiamini ersersippaa ilimanaateqartillugu unnerluutigineqartup paasissutissat suliffimminit pissarsiarisimasinnaagai, aammalu suliap misissorneqarsimaneranit paasissutissiisimanera imaannaanngissinnaasutut nalilersimagaa, eqqartuussiviup pisuunermik apeqqut pillugu tunngavilersuuteqarpoq.
- Eqqartuussisut sakkukinnerulersitsinissamut pissutissarsinngillat. Sakkortunerulersitsinissamulli pissutissaqarpoq, paasissutissat sulinermut atatillugu pissarsiarisimasani suliunnaareeraluaruniluunniit nipangiussimasussaallugit nalunngikkaluarlugu pisussaaffimminik unioqqutitsimmat, eqqartuussisut allapput.
Suliaq suliassanngortinneqaqqippoq
Eqqartuussiviup aalajangerpaa unnerluunneqartoq, ukioq ataaseq misilinneqaatigalugu, ulluni 30-ni utaqqisitamik inissiisarfimmiittussanngortinneqassasoq. Unnerluunneqartup suliaq Nunatta Eqqartuussivianut suliassanngorteqqippaa, taamaattumillu eqqartuussut Nunatta Eqqartuussiviani misilinneqartussanngorpoq.
- Nipangiussisussaatitaanermik unioqqutitsineq akuerineqanngisaannassaaq. Innuttaasutut inatsisitigut illersugaanerput pimoorullugu tiguneqartariaqarpoq, suliami pinerlineqarsimasoq, Naasunnguaq Ignatiussen Streymoy, Sermersuup Eqqartuussiviani suliaq naammassineqareersoq Sermitsiaq.AG-mut oqaaseqarpoq.