Sullissisoq arnamut inuusuttumut kinguaassiuutinut tunngasunik allagaqartarsimasimagami soraarsitaasimasoq

Kommuneqarfik Sermersuumi sulisup arnamut inuusuttumut ataatsimut arlinnulluunniit, kommunimit paaqqutarineqartunut kinguaassiuutinut tunngassuteqartunik allagaqartarsimasutut unnerluutigineqareersoq, kommunip sullissisumik soraarsitsisimanera ombudsmandimit isornartorsiorneqarpoq.

Leiff Josefsen

MERETE LINDSTRØM

sisamanng 15. dec 2022 06:46

Annonse

Kommuneqarfik Sermersuumi Meeqqanut Ilaqutariinnullu Ingerlatsivimmi sulisoq siorna septembarip qaammataani soraarsinneqarpoq. Tamanna pivoq, sulisup allakkanik kinguaassiuutinut tunngasunik imalinnik inuusuttumut angerlarsimaffiup avataanut inissiinerup kingornatigut malitseqartitsivimmi najugaqartumut ataatsimut arlalinnulluunniit nassiussisarsimanera kommuni paasitinneqarmat.

Suliaq naatsumik

Sulisoq kommunimi suli atorfinitsinneqaranili, Kommuneqarfik Sermersuumi Meeqqanut Ilaqutariinnullu Ingerlatsiviup angerlarsimaffiup avataanut inissiinerup kingornatigut malitseqartitsivianiittumut inummut aqqanik taaneqanngittumut kinguaassiuutinut tunngassuteqartunik 2021-mi maajip juunillu qaammataanni sisamariarluni allagaqartarsimavoq.

Pineqartoq 2021-mi juulip aallaqqaataani Kommuneqarfik Sermersuumi Meeqqanut Ilaqutariinnullu Ingerlatsivimmi sullissisutut atorfinitsinneqarpoq.

Sulisoq 201-mi aggustip qaamataani inummut aqqanik taaneqanngitsumut kinguaassiuutinut tunngassuteqartunik imalimmik aamma assimik tamataqanngitsumik nassiusseqqissimavoq.

Kommuni 2021-mi aggustip 30-ani paasitinneqarpoq, sulisoq angerlarsimaffiup avataanut inissiinerup kingornatigut malitseqartitsivianiittumut ataatsimut arlalinnulluunniit kinguaassiuutinut tunngassuteqartunik allagaqartarsimasoq.

Tamanna pisimavoq, ulloq unnuarlu paaqqinnittarfimmi kommunnip meeqqanik inuusuttunillu inissiisarfiani pisortap ilisimatitsissutigimmagu, niviarsiaqqat marluk assuaarnartunik kanngunarsaataasunillu sullissisumit allaffigineqartarnertik unitsinniarlugu ikioqqullutik saaffiginnimmata. Ulloq unnuarlu paaqqinnittarfimmi pisortap oqaatigisimavaa, sullissup kannaamik assinganik nassitsilluni allattarsimasoq niviarsiaqqanik atoqateqarusulluni.

Taamaammat kommuni 2021-mi aggustip 31-ani sulisup soraarsinneqarnissaa eqqarsaatigalugu illuatungiusup isumaanik tusarniaaniarluni sulisumik aggersaasimavoq. Ulloq taanna allakkat tigusimallugit nalunaarsimavoq, illuatungiusutullu akissuteqarnissamut periarfissani atorsimanagu. Akissuteqarnissamut ulloq 6. september 2021 killiliunneqarsimavoq.

2021-mi septembarip qulingiluaani kommunip sullissisoq soraarsippaa.

Kommunimit paasissutissiissut ingerlaannartumik iliuuseqarfigineqassasoq aalajangerneqarpoq, sulisumillu pineqartumik soraarsitsinissaq eqqarsaatigalugu illuatungiusutut isumaanik tusarniaaniarluni aggersaasoqatsiareersoq sulisoq suliunnaarsinneqarluni.

Tunngavilersuut eqqoqqissaanngitsoq

Ombudsmandip maanna kommunip suliamik suliarinnissimanera isoralugu oqaatigaa. Ilaatigut kommunip illuatungiusumik tusarniaanissamut suliassat suliarineqartarnerat pillugu inatsimmi malittarisassanik aamma soraarsitsinissamut tunngavilersuinissamut suliassat suliarineqartarnerat pillugu inatsimmik unioqqutitsisimanera isornartorsiorneqarpoq.

- Ombudsmandi naliliivoq kommunip suliami illuatungiusup isumaanik kommunimi atorfeqartitaasumik peersitsissamaarneq pillugu tusarniaanera amigaateqartoq, pissutsimmi peersitsissamaarnermut pingaaruteqartut kommunip naammattumik erseqqissarsimanngimmagit. Tamanna Ombudsmandip ajuusaarnartutut isigaa.

Ombudsmandip aamma oqaatigaa, kommunip peersitsisoqarnissaanik aalajangiineranut tunngavilersuut amigaateqartoq, piumasaqaatinimmi suliassat suliarineqartarnerat pillugu inatsimmi aalajangiinermut piumasaqaataasunik eqqortitsisuunnginnami. Tamanna Ombudsmandip ajuusarnarluinnartutut isigaa.

Ombudsmandi suliamut atatillugu iliuuseqaqqinngitsoq

Ombudsmandi isornartorsiuigaluarluni naliliivoq, sulisoq peersinneqartoq pisunik paasinnissinnaaneranut kommunillu aalajangiinnginnerani aalajangiinissamut tunngavigisaanik sunniinissamut periarfissaanut sunniuteqanngitsoq, taamaammat ombudsmandip suliaq iliuuseqarfigeqqinnagu unitsissimavaa.

Kommunimit ombudsmandimut akissutigineqarsimavoq, kommunimi ajornartorsiut pillugu saaffigineqareernermi kissaatigineqarsimasoq sulisup atorfimminit soraarsinneqarnissaa, ulloq unnuarlu paaqqinnittarfimmi meeqqanik sullissisuummat, ernummatigineqarmallu meeqqanut attaveqartarnini ingerlatiinnassagaa. Kommunimit aamma ilisimatitsissutigineqarsimavoq, sulisoq ulloq unnuarlu paaqqinnittarfimmi niviarsiaqqat marluk pineqartut najugaqarfigisaani pisortamit politiinut unnerluutigineqarsimasoq.

Meeqqanut Ilaqutariinnullu Ingerlatsivimmi sullissisup atorfimminit soraarsitaanerani, pineqartup pissusilersornera atorfeqartitaanermut tunngasunik unioqqutitsinertut ima annertutiginersoq/kusanaatsiginersoq tamanna peersitsinermut tunngavilersuutaasinnaanersoq ombudsmandip isummerfigisimanngilaa.

inuiagatigiit nunatsinnit