Suliunnaarnermut atatillugu Kommune Qeqertalik 3 millionit koruuninik aningaasartuuteqartoq

Kommune Qeqertalimmi sulisut ikiliartuinnarnerat, kiisalu pisortatut atorfillit suliunnaarnerannut atatillugu aningaasartuutaasartut amerlavallaalersimasut, kommunalbestyrelsimi Siumut isumaqarpoq. Sulisoqarniarnerli pillugu ajornartorsiortoqanngitsoq borgmesteri erseqqissaavoq.

– Pisortatut atorfiit pilerinarsarneqassappata, atorfininnermi ineqarnikkullu atugassarititaasut pitsaasuusariaqarput, tamannalu ajoraluartumik Kommune Qeqertalimmi illoqarfinni mikinerusuni tamakkiisumik atuutinngilaq, Aqqa Samuelsen, Kommune Qeqertalimmi kommunalbestyrelsimi Siumup gruppiani siulittaasoq oqarpoq.

Kommune Qeqertalik 1. januar 2018-mi pilersinneqarmalli maannamut pisortatut atorfillit arfineq pingasut suliunnaarnerannut atatillugu akissarsiaqartinneqassasut isumaqatigiissutigineqarsimavoq. Agguaqatigiisillugu pisortatut atorfilik suliunnaartoq qaammatini arfineq marlunni 375.000 koruuninik akissarsiaqartinneqartarsimavoq, taamaalilluni suliunnaarnermut atatillugu aningaasarsiaqartitsinermut 3 millionit koruunit missaat atorneqarsimallutik.

Ukiuni kingullerni marlunni arfarmilu atorfinittut suliunnaartullu qasserpiaanersut kommunemit nalunaarsorneqarneq ajorput, taamaattorli Kommune Qeqertalik pilersinneqaqqaarmat inuit katillugit 1.000-it missaat sulisorineqarsimasut, maannakkullu 840-t sulisorineqartut, Kommune Qeqertalimmi aningaasaqarnermut pisortaq, Nicolai Odgaard Jensen, paasissutissiivoq.

Kommune Qeqertaliup pilersinneqarneranut atatillugu aaqqissuusseqqinnermut nutarterinermullu atatillugu sulisut ikinnerunissaat, taakkuli innuttaasunut qaninnerusumik pitsaasumillu sullissisuunissaat anguniarneqarsimasoq, aningaasaqarnermut pisortaq oqarpoq.

Borgmesteri Ane Hansenip, Inuit Ataqatigiinneersup, atorfinitsitsiniarnermut tunngatillugu kommune ajornartorsiuteqannginnerarpaa. Taamaakkaluartorli suliunnaarnermut atatillugu aningaasartuutaarsartut amerlavallaarujussuartut, sulinermilu atugassarititaasut pitsaanerusariaqartut, kommunalbestyrelsimi ikinnerussuteqartut Siumukkut isumaqarput.

Allaaserisaq tamaat uani Sermitsiami atuaruk:

Powered by Labrador CMS