Suliumajunnaartoqarnissaanut siorasaarisoqareersorlu isumaqatiginninniarnerit aallartisarput
SIK-p pisortallu akornanni akissarsianut tunngatillugu isumaqatiginninniarnerit aallartisaqqilerput. Pisortat neqeroorutissaat tulleq SIK-p maanna utaqqivaa.
SIK-mi ilaasortat arlallit akissarsianut tunngatillugu pisortat neqeroorutissaat SIK-p maanna utaqqivaa.
SIK-p siulittaasuata, Jess G. Berthelsenip tamanna Sermitsiaq.AG-mut uppernarsarpaa.
Sulisartut SIK-p ataaniittut pillugit isumaqatiginninniarnerit qangali uninngapput, illuatungeriit naaperiarsinnaanatik isumaqatigiinngivissorsimammata.
SIK-mi siulersuisuunerit tallimanngormat immikkut ittumik ataatsimiipput, pisortanit neqeroorutip tullia naammaginarsinnaanngippat suliumajunnaartitsinissaq oqaluuserineqarluni.
- Siulersuisuunerni isumaqatigiissutigineqarpoq pisortat akissarsianut tunngatillugu neqeroorutaat tulleq naammaginanngivippat, tassa iisinnaanngivissorutsigu, suliumajunnaarsitsinissaq alloriarnerussasoq tulleq, Jess G. Berthelsen Sermitsiaq.AG-mut uppernarsaavoq.
Inuuniarneq akisunerulersoq
Akissarsianut tunngatillugu isumaqatigiissutit, ilaatigut portørtinut, meeqqerisut isumaginninnermilu ikiortit, peqqinnissamut ikiortit, nunaqarfinni peqqinnissaqarfinni sulisut, aamma suliamik ilinniagallit ilinniagaqanngitsullu SIK-p ataani qaammammusiaqartinneqartut.
Sulisartut taakku isumaqatigiissutaat ukioq manna naassaaq, nutaamilli suli isumaqatigiittoqarani.
Pisortat appasippallaamik neqerooruteqassappata, SIK-p akuerilersaanngilaa.
- Ilaasortatta ulluinnarni atugaat pineqarput. Pisortanit neqeroorut annikippallaassappat akuerinavianngilarput. Pisiniarfinni akit qaffakkiartulerneri malugilereerparput, malugipiluttorujunngoreerparput, Jess G. Berthelsen oqarpoq.
Taassuma nunatsinni aningaasaqarnerup ingerlalluarnerulernissaa anguniarlugu suliniutit angisuut aallartinneqarnissaat ujartorpaa.
- Nunarput suliniutinut angisuunut aningaasaliisariaqarpoq, ilaasortagut akissaqarfigineqalerniassammata. Naammaginngilarput pisortanit oqarfigineqarnissaq akissaqarfigineqanngitsugut, Sermitsiaq.AG-mut oqarpoq.