Suliumajunnaarnissamik sioorasaarineq: SIK Dansk Metalilu aaqqiagiinngillat
Dansk Metalip Air Greenlandimut suliumajunnaartoqarnissaanik ilimasaaruteqartigani SIK paasiteqqaarsimanngilaa. Danmarki angajutut pissusilersortoraasit Jess G. Berthelsen oqarpoq.
Dansk Metalip, Air Greelandip timmisartunut mekaniikeriisa kattuffiat, Air Greenlandimut suliumajunnaartoqarnissaanik ilimasaaruteqartigani SIK attavigisimanngilaa. Qallunaat kattuffata SIK-llu, kalaallit mittarfiini assartugalerisuia kattuffiat, akornanni aaqqiagiinnginnermik kinguneqarpoq.
Aviisi AG allappoq.
Akerleriinneq Air Greenlandip timmisartorsuanut, Kangerlussuup Københavnillu akornanni timmisartuanut tunngavoq. Suliumajunnaarnissaq juunip 23-ani aallartissasoq ilimasaarutigineqarpoq, illuatungeriilli Isumaqatigiissitsiniartarfimmut Københavnimiittumut qaaqquneqarnissartik utaqqivaat. Tassani suliumajunnaarnissamik sioorasaarineq piviusunngortinnagu aaqqiissutissamik naaperiuteqartinniarneqassallutik.
Air Greenlandip timmisartunilu mekanikerit aningaasarsianut isumaqatigiinniarnerat, suliumajunnaarnissamik sioorasaarinermik ilaqartoq, SIK ilisimasaqarfiginngikkaa Jess G. Berthelsen paasissutissiivoq. Dansk Metalimmi SIK isumaqatigiinniarneq pillugu paasitissimanngilaa.
- Ilisimasaqanngilagut, Dansk Metalimmi SIK attaveqarfiginikuunngilaa. Danmarkip angajutut pissusilersortarneraasit pivoq. Qallunaat kattuffiata Kalaallit Nunaanni akissarsiortut atugaat pillugit isumaqatiginninniartoqarnerani SIK attaveqarfigisimanngikkaa ajorpoq naammaginanngilluinnarlunilu, Jess G. Berthelsen AG-mut oqarpoq.
Aviisimi AG-mi atuarnerusinnaavutit. Aviisi uani pissarsiariuk:
