Suliumajunnaarneq: Ajornartoornermi pilersaarutip silaannakkut angallassineq qulakkeersinnaavaa
Suliumajunnaartoqassagaluarpat DMI-mut ajornartoornermi pilersaarut ullumikkut oqaluuserineqassaaq.
Danmarkimi suliumajunnaarnersuaqassagaluarpat, Kalaallit Nunaanni timmisartumik angallassinerup qulakkeerneqarnissaa immaqaq iluatsilerpoq. Tassami illuatungeriit uaimut DMI-mut ajornartoornermi pilersaarummik oqaluuserinnipput. Magisterforeningen Sermitsiaq.AG-mut taama ilisimatitsivoq.
DMI-mi suliumajunnaartoqassagaluarpat nunap iluani angallanneq tamarmi unitsinneqarsinnaasoq sornatigut oqaluttuarereerparput. Nunap iluanilu angallattoqarunnaarpat Atlantiku qulaallugu timmisartuussinissaq pisariaqarunnaassaaq. Maanna suliumajunnaartoqarnissaanik aarlerisaarisoqarnerata timmisartumik angallannermut immikkut ittumik silassamik ilimasaarutit TAF-inik taagorneqartut eqqorneqartussaanerannik pissuteqarpoq.
Taamaattunik isilasamik ilimasaaruteqartoqartinnagu timmisartortitseqatigiiffiit mittarfinnik marlunnik toqqagassaqartariaqassapput, nunap iluanilu angallannermi tamanna periarfissaanngilaq.
Kisianni maanna Moderniseringsstyrelsen Naalagaaffik sinnerlugu isumaqatiginninniartoq, Akademikernes Centralorganisation qaaqquaat, tassani DMI-mi sulisut aalajangersimasumik amerlassusillik suliumajunnaarnermit peqataatinneqannginnissaat oqaluuserineqartussanngorlugu, taamaalilluni ajornartoornermi upalungaarsimanermik periarfissaqarniassammat.
Suliumajunnaarnissaq apriilip sisamaanni aallartittussatut kalerriutigineqarpoq. Taannali marloriarluni ullunik 14-nik kinguartinneqarsinnaavoq. Isumaqatiginninniartitsisup suliumajunnaarneq minnerpaamik ataaseriarlunikinguartikkajuttarpaa. Taamaammat apriilip 18-at imaluunniit maajip aappaanni isumaqatigiittoqarsimanngippat suliujumajunnaarnissaat ilimanarsinnaavoq.