Sulisuusimasoq kajumissaarisoq: Tasiilami meqqat inuusuttullu ikiorneqarlik
Kommuneqarfik Sermersuumi sulisuusimasoq Danmarkimi isumaginninnermut utoqqarnullu ministerimut allagaqarsimavoq. Taanna isumaqarpoq, ministeri Tasiilami meeqqanut inuusuttunullu atugarliortunut ikiuuttariaqartoq.
Inger Kirstine Larsen Tasiilami inuusuttut ornittagaanni upernaaq sulisimavoq, taanna misigisimasaminik aalassassuteqarsimaqigami Danmarkimi isumaginninnermut utoqqarnullu ministerimut Astrid Kragimut (S) allagaqarsimavoq.
Mailikkut allakkamini isumaginninnermut utoqqarnullu ministerimut kaammattuutigaa, Tasiilami meeqqat inuusuttullu iliuuseqarfigalugit ikiorsissagai.
Inger Kirstine Larsen danskit perorsaasut pingasut peqatigalugit Tasiilami inuusuttut ornittagassaat aallartinniarlugu Kommuneqarfik Sermersuumit atorfinitsinneqarsimapput. Perorsaasulli taakku sisamat suleqateqarniarnermik ajornartorsiuteqartoqarnera pissutigalugu qaammatialunnguit ingerlareersut suliunnaarsimapput:
Suleqateqarniarnermik ajornartorsiuteqartoqareersoq angerlarsimasut
- Tamatta suliffitsinnit soraarpugut, inivut allanut attartortippavut ilaqqutaavullu aamma ukiumi ataatsimi marlunnilu ikinngutigisavut inuulluaqqullugit.
- Kalaallit aqutsisut suleqatiginiarnerat annertuumik ajornartorsiutaammat tamatta maanna angerlarsimavugut, Inger Kirstine Larsen ministerimut allappoq.
Inger Kirstine Larsenip tassunga atatillugu kommuni sakkortuumik isornartorsiorpaa, pisumut annertuumik akisussaaffeqartutut isumaqarfigingamiuk. Pisorlu naggataatigut meeqqanut kingunerluttussaasoq oqaatigalugu:
Meeqqat inuusuttullu sumiginnarneqartut
- Tasiilami meeqqat inuusuttullu sumiginnarneqaqqipput. Meeqqat inuusuttullu ajornartorsiuteqangaaramik imminnut toqunnissartik aniguiffissatuatut kisiat isigisarpaat.
- Sulisuulluta suliniutigineqartoq ingerlakkusuttorujussuusimavarput, ullormiilli siullermi assortorneqalersimalluta. Ajornartorsiutaasut annertoorujussuit erseqqissaassutiginerisigut sulerusussimanerput takutikkusupparput, neriulluta tamanna aqqutigalugu inuusuttut ikiorserneqarumaartut, Inger Kirstineq Larsen allappoq.
Isumaginninnermik suliaqarfik nunatta kisimi akisussaaffigigaluarpaa, Inger Kirstine Larsenilli Sermitsiaq.AG-mut oqaluttuaraa, Danmarkip Nunatsinni isumaginninnermik suliaqarnera tapersersorniarlugu siusinnerusukkut 80 millioner koruuninik tapiissuteqarsimanera pissutigalugu, Danmarkimi ministerimut allagaqarniarluni aalajangersimalluni.
- Allakkat uku tunngavigalugit neriuutigaarput, Tunumi susoqarnera pillugu oqaloqatiginiarluta naapikkusussagitsigut, Inger Kirstine Larsen ministerimut allappoq.
Forstanderiusimasup isornartorsiuisimanera
Inuusuttut ornittagaanni forstanderiusimasup Karina Steensgaardip aamma kommuni isornartorsiorsimavaa, pingaartumik meeqqanut ilaqutariinnullu pisortaq Martha Lund Olsen isornartorsiorsimallugu.
Martha Lund Olsenip suleqatigiinniarnermik ajornartorsiuteqartoqarnera ilumoornerarlugu oqaatiginikuuaa, inuusuttullu ornittagaanni sulisut sisamat suliunnaarsimanerat ajuusaarutiginerarlugu. Pisortalli danskit perorsaasut akerlilersorsimannginnerarpai.
Sermitsiaq.AG-mit Kommuneqarfik Sermersuumi borgmesteri Charlotte Ludvigsen (IA) suliamut qanoq oqaaseqarsinnaanersoq aperineqarsimavoq, Tasiilami isumaginninnikkut ajornartorsiutaasartut isumagineqarnissaat anguniarlugu kommuni aningaasanik atuisimammat, sulisullu qaammatialunnguit ingerlariiginnartut suliffimminnit soraarsimammata.
Borgmesteri: Pisortat tamanna suliassaraat
Kommunimit allakkatigut akissuteqaammi allassimavoq, borgmesterip pisoq oqaaseqarfigisinnaanngikkaa, 'pisortat aqutsinerannut tunngassuteqarmat, aamma kommunimi suliffeqarfiit ataasiakkaat pisortat suliassarimmassuk'.
Borgmesterimilli oqaatigineqarsimavoq, Kommuneqarfik Sermersuumit politikkikkut anguniagaasoq Tasiilami najugallit aqutsinerulernissaat, taamaalilluni suliamut tunniussimanerusoqalerlunilu sulineq nuannarineqarnerulissammat:
- Najukkami peqataatitsineq pingaaruteqarpoq. Najukkami suliassamik kivitsisoqarsinnaanera tatigilluinnarparput. Najukkami akisussaaffeqartitsinikkut suleqatigiinnerulernissaq, tunniussimanerulernissat, angusaqarnerusalernissaq suliamillu nuannarinnerulernissaq anguneqarsinnaavoq, Charlotte Ludvigsen oqarpoq.
Inger Kirstine Larsenip borgmesterip oqaasii isumaqatigivallaanngilai, isumaqarami meeqqat inuusuttullu ajornartorsiuterpassuaqarlutik atugarliortut ikiorserniarlugit ilinniagalinnik sulisoqarnissaa pingaaruteqarluinnartoq:
- Sulisut ilinniarsimasut meeqqanik inuusuttunillu atugarliortunk isumaginnillutillu tapersersuisinnaasut pingaarutilipilussuupput. Tamannami pissutigalugu uagut atorfinitsippaatigut, Inger Kirstine Larsen oqarpoq.