Sulisut kattuffii: Sulisut mianeralugit

Sulisut kattuffiisa AK-p SIK-ullu erseqqissaatigaat, Nukissiorfiit soraarsitsinissamik nalunaarutaat pillugu politikkikkut assigiinngitsunik nalunaaruteqartarneq sulisunut pineqartunut sakkortuumik eqquisoq.

Siullermik Steen Lynge mianersoqqusivoq, Nukissiorfiit sineriammi sullitaminik kiffartuussisarnerminik digitaliseeriiniarnera sulisunik 13-inik soraarsitsinissamik nassataqartussaq saqummiunneqarmat.

Pisariillisaaneq sulisunik akeqartariaqanngitsoq, taanna isumaqarpoq. Kingusinnerusukkut Steen Lynge Naalakkersuisullu isummaninnik allannguipput, soraarsitsiniarnerlu pillugu Aningaasaqanermut Sulisoqarnermullu Aqutsisoqarfimmit nalunaarusiaq tigugamikku akuersaarlugu.

Nukissiorfiit maanna namminneq aalajangersinnaanngorpaat, sulisut pineqartut suliffeerutissanersut imaluunniit suliffeerutissannginnersut.

Aningaasaqarnermut Naalakkersuisup Vittus Qujaukitsup aamma kingullertigut isornartorsiorpaa, Naalakkersuisooqatimi suliffeqarfiup nammineertitap suliaq politikkikkut suli eqqartorneqanngitsoq soraarsitsiniarneranut akuersaarsimanerat.

Nalunaarutigineqartullu arlallit sulisunut suliffimminnik annaasaqarsinnaasunut toqqissisimatitsinngillat, sulisut kattuffiinit erseqqissaatigineqarpoq.

- Piumasaraarput sulisut suliffimminnik annaasaqarsinnaasut eqqarsaatigineqassasut, AK-mi kaammattuutigineqarpoq.

SIK-mi aamma politikkikkut suliaqartoqarnera naammagineqanngilaq:

- Politkkerit taamatut ingerlatsinermi assigiinngitsunik nalunaaruteqaraangata, sulisut ataasiakkaat qulalersittarpaat neriuuteqarnerlutsilersarlugillu, SIK-mi siulittaasoq Jess G. Berthelsen oqarpoq.

Namminersorlutik Oqartussat naapertorlugit Nukissiorfiit ilisimatitsissutigisimavaat, sulisartut kattuffiisa SIK-p AK-llu Nukissiorfiit suliamik ingerlatsinerat akuersaarsimagaat, oqaatigisimagaallu suliaq peqqissaarussamik, piareersarluarsimasumik malittarisassallu atuuttut naapertorlugit ingerlanneqarsimasoq takusinnaallugu. AK-li tamatumunnga isumaqataanngilaq.

- Suliap peqqissaarussamik, piareersarluarsimasumik malittarisassallu atuuttut naapertorlugit ingerlanneqarsimanera sukkulluunniit oqaatigisimanngilarput, AK-miimmi suliap ingerlanneqarsimanera suli nalilersorneqanngilaq.

Tamanna aamma SIK-mit ilisarineqarsinnaanngilaq.

- Suliaq akuersaarlugu allakkatigut nassiussisimanngilagut. Akerlianik allakkatigut Nukissorfinnut nalunaarutigisimavarput, sulisut arlallit namminneq piumassutsiminnik soraarsinnaanermik eqqarsaateqarnissaannut piffissaliunneqarsimasoq sivikippallaartoq, SIK-p allattoqarfiani pisortaq Bjarne Petersen oqarpoq.

Taannali isumaqarpoq, Nukissiorfiit sulisunik naleqqussaanissamut pilersaarutaat malittarisassat atuuttut malillugit pisimasutut isikkoqartoq.

Sulisut kattuffiisa taakku marluullutik Nukissiorfiit suliaq aallartitsinnagu peqataatitsisimanerat nersualaarpaat. Aggustimmi aallartinnerani Nukissiorfinnit ataatsimeeqatiserineqarsimapput suliarlu pillugu ilisimatinneqarsimallutik.

Naalakkersuisup Steen Lyngep soraarsitsiniarnermik unitsitsinera tunngavigalugu, Aningaasaqarnermut Sulisoqarnermullu Aqutsisoqarfik suliamik misissuisimavoq, suliamullut tunngatillugu ernumassuteqarnissamut tunngavissaqanngitsoq, Naalakkersuisut ilisimatitsissutigaat.

Powered by Labrador CMS