Skip to main content

Sulisut kattuffii aningaasarsiat qaffaassutaat pillugit: Qanoq oqassanerluni nalunarpoq

Kalaallit Nunaanni Pinerluuteqarsimasunik Isumaginnittoqarfimmi Parnaarussivinnilu sulisut kattuffianni, isertitsivinni sulisut aningaasarsiaasa qaffaassutissaannut ukiumut 10 millioner koruunit atorneqartarnissaat pillugu isumaqatigiissuteqarsimaneq iluarisimaarneqarpoq.

Inatsisinik atuutsitsinermut ministerip aamma Kalaallit Nunaannit folketingimut ilaasortaatitat marluk isumaqatigiissut, isertitsivinni sulisut aningaasarsiaannik, Københavnimi parnaarussivinni sulisut aningaasarsiaasa annertoqqataannik qaffaasussaq ataasinngormat ullup qeqqanut saqqummiuppaat.

Parnaarussivinni sulisut kattuffiata, Danmarkimi parnaarussivinni suliut Kalaallillu Nunaanni isertitsivinni sulisut kattuffiata tamanna nunaarutigaa:

- Nuanneruttormat qanorluunniit oqassalluni nalungangajappoq. Tamanna qangali sorsuutigisimavarput, maannalu iluatsinneqarluni, Bo Yde Sørensen Parnaarsussivinni sulisut kattuffianni siulittaasoq nuannaarluni oqarpoq.

Isumaqatiginninniutigineqartussat annikitsut

Sulisut kattuffiinut suli isumaqatiginninniutissaqarpoq, taakkuli annikitsunnguupput, Bo Yde Sørensen erseqqissaavoq:

- Taakku aamma inississavavut. Aningaasammi pissarsiarereerpavut, taakkulu isertitsivinni sulisunut atugassanngorlugit pituttugaapput. Suleqatitta Kalaallit Nunaanni sulisut aningaasarsiarisartagaat naammaginanngilluinnarput. Taamaammallu Nuummi isertitsivik sulisussarsiniarnermini ajornartorsiuteqartarpoq, taanna oqarpoq.

Nuummiittorlumi, Kalaallit Nunaanni Pinerluuteqarsimasunik Isumaginnittoqarfimmi pisortaq Naaja Nathanielsen ullumi isumaqatigiissutiginqartoq pillugu naammagisimaarinnilluinarpoq:

- Assorsuaq nuannerpoq. Suliat suliarineqartut tassa taamatut akuersaarneqartussaapput. Isertitsivinni sulinerup politikkikkut akuersaarluarneqarnera pitsaasuuvoq, Naaja H. Nathanielsen oqarpoq.

Ajornannginnerusumik sulisussarsisoqarsinnaalissasoq

Taassuma aamma neriuutigaa, aningaasarsiat qaffaaffigineqarnerisigut, ajornannginnerusumik sulisussarsisinnaasoqalissasoq:

Pinerluuteqarsimasunik Isumaginnittoqarfimmi pisortap Naaja H. Nathanielsenip, neriuutigaa isertitsivinni sulisussarsiortaneq pitsaanerulissasoq.

- Naatsorsuutigilluinnarpara, sulisutta sulisoriinnarnissaat ajornannginnerulissasoq. Aamma neriuutigaara tamana sulisussarsiortarnitsut iluaqutaassasoq, oqarsinnaalissaagummi pissanganartumik suliffissaateqarluta aamma pitsaasumik aningaasarsiaqartitsisarluta, Naaja H. Nathanielsen oqarpoq.

Isumaqatigiissut ukiuni sisamani tulliuttuni atuuttussatut isumqatigiissutaavoq, katillugit 38 millioner koruunit immikkoortinneqarsimallutik. Bo Yde Sørensen naapertorlugu, isertitsivinni sulisut Danmarkimi suleqatimik aningaasarsiaasa annetoqqataannik pisalisagunik, aningaasarsiaat qaammammut 5.000 koruunit missaannik qaffanneqartassaaput.

2023-p kingornanu aningaasanik immikkoortitsisoqarsimanngikkaluartoq, sulisut kattuffianni siulittaasup takorloorsinnaannginnerarpaa, 2023-p kingorna aningaaasarsiat appartinneqarsinnaanerat.

- Naatsorsuutigilluinnarpara tamanna ataavartumik atugassanngorlugu inissikkumaaripput. Takorloorsinnaanngilara, arlaata pissusitqqanut utertissagaatigut, Bo Yde Sørensen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER