Sulisut kattuffii akerliusunut ilannguttut

Ippassasq Nuummi, Aasianni, Sisimiuni, Paamiuni Narsamilu akerliussutsimik takutitsisoqarpoq, innuttaasut tuusinntilikkuutaat akitsuutinik qaffaaneq, ilaatigut mamakujuit, sukkut, immiaaqqat, viinnit cigarettillu akitsuuserneqarnerat pillugu nilliapput ”Naammaleqaaq”.

Nunatsinni Perorsaasut Kattuffiat (NPK), Kalaallit Nunaanni Ilinniartitsisut kattuffiat IMAK, Peqqinnissaq pillugu Kattuffiit PPK aamma Atorfillit Kattuffiat (AK) isumaqarput, aningaasarsiat qaffaassutissaattut ukiumi matumani siusinnerusukkut isumaqatigiissutaasoq akitsuutit qaffanneqarnerannit iluaqutaajunnaartoq.
- Ukioq manna kattuffiit arlallit aningaasarsiat pillugit isumaqatigiissutit nutaat, aningaasarsianik naleqqussaaniarfiusimasut atsiorpaat. Aningaasarsiat qaffaataat maanna akitsuutinit nungunneqareerput. Naalakkersuisut allatut pingaarnersiuisaraqarput, AK, NPK, PPK aamma IMAK taamatut isumaqarput.

Kaammattuineq piffissaq naalluinnartorlu pivoq. 2020-mut Aningaasanut inatsisissaq pillugu pingajussaanik kingullermillu ullumi Inatsisartuni suliarineqassaaq.

Upperinnissimaneq

- Sulisut kattuffiisa assigiinngitsut isumaqatigiissutissat nutaat isumaqatigiissutigigamikkit aningaasarsiallu qaffaassutissamininngui atsioramikkit, maanna naalakkersuisuusut akitsuutinik qaffaaniannginnerat upperisimavaat, kattuffinni siulittaasut, maanna naalakkersuisooqatigiit qineqqusaarnermi “akitsuutit attorneqannginnissaannik neriorsuisimanerannik” innersuussillutik allapput.

- Akileraarutit innuttaasut ulluinnarni inuunerannut iluaqutaasussanngorlugit atorneqarnissaat takorusunneruarput, akileraartartut akitsuutitigut, ulluinnarni inuussutissat akisunerulerneqannik kinguneqartussanik, pillarneqarnissaannut sanilliullugu, sulisut kattuffiini siulittaasut, perorsaasussaaleqinerup qanoq aaqqiiffigineqarsinnaaneranut kisitsisinik tigussaasunik ujartuisut isumaqarput .

- Ilaasortarpassuavut meeraaqqerivinnik meeqqerivinnillu atuisuupput. Taamaammat ilaasortavut toqqissisimasumik sulisinnaaqqullugit taakku ajunngitsumik ingerlanissaat soqutigisaraarput, taakku ernumassuteqarlutik taamatut oqarpoq.

Pilersaarutit tigussaasut

NPK-mi siulittaasoq tigussaasunik pilersaaruteqartoqarnissaanik ujartuivoq.

- Ilaasortavut oqaasiinnarnik kimeqanngitsunik neriorsorneqartassanngillat. Ilaasortatta sulinerminni aningaasarsiatigullu atugaannik qanoq pitsanngorsaasoqarsinnaaneranut pilersaarutinik tigussaasunik takorusuppugut. Perorsaasunut atugassarititat pillugit isumaqatiginninniarluta suliluunniit aallartinnata aningaasat atorneqareersimasut paasivarput. Aningaasanut inatsisissatut isumaqatigiissut taamatut isikkoqartillugu, isumaqarpugut tamanna tunngaviusunik iluarseeqqaarani asuli aaqqiiniarnerusoq, NPK-mi siulittaasoq Juliane Tobiassen, ilaasortat 370-it sinnerlugit taamatut oqarpoq.

- Ingerlatseqatigiiffiit akileraarutaasa appartinneqarnissaannut 162 millioner koruuninik immikkoortitsisoqarsimaneranut akitsuutinik qaffaaneq naapertuutinngilaq. Akerliaqnik aningaasat taakku perorsaasut aningaasarsiaannut peqqinnissaqarfimmillu pitsanngorsaanermut atorneqarsinnaagaluarput.

Politikkerit qattuppavut

AK-mi siulittaasoq Dina Olsen, ilaasortanit 1.250-init taperserneqarluni imatut oqarpoq:

- Politikkerit akitsuutit, ilaasortatta ulluinnarni atugaannut toqqaannartumik sunniuteqartussat, pillugit aalajangiitinnatik uagutsinnut tusarniaaneq ajornerat qatsupparput. Kinguneqaataasinnaasunik misissuinissatsinnut periarfissinneqartariaqaraluarpugut, ajoraluartumilli ullormiit ullormut aalajangiisarnerit takujuaannarpavut.

- Eqqaamaneqassaaq; anguniagaq isumaqatigiissutigigaangatsigu, qaammatini arlalinni, ilaannikkut ukiorpassuit ingerlaneranni taamatut angusaqarniarluta ulapissimanitsinnik tunngaveqartarmat. Taamaakkaluartoq politikkerit piffissap sivikitsuaqqap ingerlanerani ilaasortatsinnit aningaasanit aallertartut ajoraluartumik takusarparput, Dina Olsen oqarpoq.