Sulisut arlallit suliumajunnaarsinnaanerat SIK-p oqaluuseraa
SIK-p Namminersorlutillu Oqartussat akornanni akissarsianut tunngatillugu isumaqatiginninniarnerit unittuueqqapput. Pisortallu qanillinerusinnaanngikkutta, sulisoqatigiit arlallit suliumajunnaarnissaat oqaluuserissavarput, Jess G. Berthelsen oqarpoq.
SIK-p ilaasortaasa akissarsiaannut tunngatillugu isumaqatigiittoqarsinnaanngivippat suliumajunnaartoqarnissaa oqaluuserineqartussanngorpoq.
Sulinermik inuussutissarsiuteqartut kattuffiani siulersuisut ataatsimeereersullu SIK-p siulittaasua, Jess G. Berthelsen Sermitsiaq.AG-mut taama ilisimatitsivoq.
- Pisortanit sapaatip akunnerani uani qaamanimininnguamik akuerisinnaasatsinnik tunineqanngikkutta, siulersuisuunerit sapaatip akunnerata tullianut immikkut ittumik ataatsimiigiaqquneqassapput. Ataatsimiinnermilu oqaluuserineqassaaq sulisut pineqartut suliumajunnaarsinnaanissaat, Jess G. Berthelsen Sermitsiaq.AG-mut oqarpoq.
- Pisortaniit minnerpaamik akuerisinnaasarsi suugami?
- Soorunami tamanna oqaatigisinnaanngilara, isumaqatiginninniarnernut tunngammat. Isumaqatiginninniarnerilli naammaginarnerusariaqarput qaamanimininnguamik takussagutta, Jess G. Berthelsen oqarpoq.
Ilaatigut portørit akissarsiaat isumaqatiginninniutigineqarput. Taakku akissarsiaminnik naammaginningatik isumaqatiginninniartullu unittooqqaneri pillugit iluarisimaarigatik nalunaaruteqartareerput.
Allat isumaqatiginninniarnernut ilaasut tassaapput meeqqerisut isumaginninnermilu ikiortit, peqqinnissamut ikiortit, nunaqarfinni peqqinnissaqarfinni sulisut, aamma suliamik ilinniagallit ilinniagaqanngitsullu SIK-p ataani qaammammusiaqartinneqartut. Akissarsianut tunngatillugu isumaqatigiissutit pineqartut ukioq mannamut killeqarput, isumaqatigiissummillu nutaamik suli atsiortoqanngilaq.
Isumaqatigiinnissamut ungasippallaartut
SIK-p siulersuisuuneri sapaatip akunnerani matumani ataatsimiipput. Ataatsimiinnermi portørit suliumajunnaarnissamut piumasaqarsimanerat aamma oqaloqatigiissutigineqarpoq.
- SIK-mi siulersuisuunerit taama piumasaqarneq sukumiisumik tiguarput. Aamma paasinarpoq utaqqikatannerat, Jess G. Berthelsen oqarpoq nangillunilu:
- Akissarsianut tunngatillugu isumaqatiginninniarnerni pisortat kattuffiullu ungasilluinnarnerat siulersuisuunernit imaannaanngitsumik aamma tiguneqarpoq, Jess G. Berthelsen oqarpoq.
Jess G. Berthelsen Sermitsiaq.AG-mut oqaluttuarpoq neriuutigalugu isumaqatiginninniarnerni killiffik pillugu aqagu paasisaqareersimalissalluni.
Isumaqatiginninniarnerilli siuariaallassanngippata SIK-mi siulersuisuunerit marlunngorpat pingasunngorpalluunniit immikkut ittumik ataatsimiittussatut aggersarneqassapput. Immikkut ittumik ataatsimiinnermi apeqqut suliumajunnaarnissamut tunngasoq kisimi oqaloqatigiissutigineqassaaq.