Sulisut angerlartitat: Pisortani sulisut pinngitsaalissummik sulinngiffeqartinneqassanngitsut
Angerlartinneqarsimagaanni sulinngiffeqarnissamut piumasaqaateqarnermut tunngatillugu namminersortuni pisortaniluunniit sulisut assigiinngitsunik atugaqartinneqarput
Pisortat suliffeqarfiini sulisut angerlartinneqarsimasut, taamalu feeriarsinnaasut, feeriarnissamik piumasaqarfigineqarsimanngillat. Namminersortut suliffeqarfiini sulisut feeriarnissamik piumasaqarfigineqarput, tassani sulisitsisut aningaasarsiassat taartissaannik ikiorserneqarsimallutik.
Danmarkimi naalakkersuisut suliffeqarfinnut isumaqatigiissutigeqqammerpaat, pisortat suliffeqarfiini sulisut angerlartinneqarsimasut ulluni tallimani feeriartinneqassasut. Angerlatinneqartut tamakkiisumik aningaasarsitinneqassapput.
- Isumaqatigiissuteqarnermi siunertaavoq, ajornartorsiut qaangiuppat suut tamarmik aallarteqqittussanngorpata, sulinngiffeqartut amerlavallaannginnissaat, akileraartarnermut ministeri Morten Bødskov oqarpoq.
Pilersaarutaanngitsoq
Naalakkersuisoqarfimmi pisortap Nikolai S. Christensenip Sermitsiaq.AG-mut ilisimatitsissutigaa, Namminersorlutik Oqartussani taamatut iliuuseqarnissaq oqaluuserineqarsimanngitsoq.
- Periarfissaasinnaasulli tamarmik ammatinneqarput, naalakkersuisoqarfimmi pisortaq coronap ajornartorsiortsitsinerata qanoq sivisutiginissaa apeqqutaasoq pillugu oqartoq ilisimatitsivoq.
Suliffeqarfinni namminersortuni sulisitsisoq aningaasarsiat taartissaannik pisortanit ikiorserneqarsinnaavoq, ikiorserneqassappalli piumasaqaataavoq sulisut soraarsitaannginnissaat, tassa qaammatit tamaasa aningaasarsiassanut tunngatillugit ikiorserneqassagaanni ullut tallimat qaangiuttoornermut taarsiullugu sulinngiffeqartoqarsinnaavoq imaluunniit feeriartoqarsinnaavoq.