Sulisut Air Greenlandip ajornartorsiornerani aningaasanik taarsigassarsitikkaat
Air Greenlandimi sulisut aningaasarsiamik 50 procentii angullugit uninngatinneqarnissaannut akuersaarsimapput. Akerlianik sulisut tamarmik suliffeqaannarnissaat isumannaarneqarsimavoq, ingerlatseqatigiiffik ilisimatitsivoq
Coronap ajornartorsiortitsinerata aamma silaannakkut angallassinerup annersaata matuneqarnerata kingunerannik Air Greenlandip piffissami aggersumi niuernermi tunngavissaata annersaa ajoqusersimavaat.
Timmisartuutileqatigiiffiup maanna sulisut isumaqatigiissuteqarfigisimavai, ajornartorsiornerup nalaani aningaasarsiassanut aningaasartuutissat kinguartinneqarnissaannik pilersaarusiornissamut.
Isumaqatigiissuteqarnikkut qulakkeerneqassaaq sulisut suliffeqaannarnissaat, tamatumunngalu peqatigitillugu ajornartorsiornerup atuunnerani akiligassanut Air Greenlandip akissaqarnissaa qulakkeerneqarluni.
Isumaqatigiissumi immikkoortut pingarnerit:
Aningaasarsiaqarnerpaat aningaasarsiaasa 50 procenti uninngatinneqassapput. Minnerpaamik 10 procentit angullugit uninngatitsisoqatassaaq .
Qaammammut 34.000 koruunit inorlugit aningaasarsisaraanni aningaasarsiat ilaannik uninngatitsisoqassanngilaq.
Soraarninngornissamut akilersuutit tamarmik uninngatinneqassapput.
Isumaqatigiissut qaammat ataasiinnaq atuutissaaq. Aningaasarsiassat uninngatinneqartut kingusinnerpaamik aggustusip qaammataani tunniunneqassapput.
Sulisut ilaat angerlarsinnaanngillat. Sulisut allat suliartorsinnaanngillat. Eqaannerusumik sulisoqartarnissaa isumaqatigiissutigineqarsimavoq, Air Greenlandi aningaasarsianut tapiliunneqartartorpassuarnik akisuunik akiliuteqannginniassammat.
Sulisut kattuffii assigiinngitsut tallimat isumaqatigiissuteqarfigineqarsimapput, taakkulu suliffissuarmi sulisunut 600-ngajannut kattuffiupput.
- Sulisut kattuffiisa tarpersersorsimavaatigut, massakkorpiarlu iliuuseqartoqartariaqarnera takusinnaasimavaat. Taamaammut ullualunnguit ingerlanerinnaani isumaqatigiissut inissinneqarsimavoq, Air Greenlandimi sulisoqarnermut pisortaq Mads B. Christensen Sermitsiaq.AG-mut oqarpoq.
Qaammatini marlunni ingerlasinnaasoq
Isumaqatigiissuteqarnikkut Air Greenland ajornartorsiornerup nalaani akiligassanut 10 millioner koruunit missaannik immikkut akissaqalerpoq.
- Anguniagaavoq sulisut tamarmik sulisoriinnarneqarnissaat. Neriuutigaarput piffissaq sivisuallaanngitsoq qaangiuppat pissutsit nalinginnaasunngoqqinnissaat, pissutsillu nalinginnaasumik ingerlaqqilerpata timmisartuussinissamut piareersimanissarput pingaaruteqarluni. Sulisoqanngikkutta taamaaliorsinnaanngilagut, Mads B. Christensen oqarpoq.
Sulisoqarnermut pisortap oqaatigaa, maanna pisoq Air Greenlandip oqaluttuarisaanerani ajornartorsiornerup annersarigaa, sulisullu isumaqatigiissuteqarnissamut piumassuseqarnerat nersualaarlugu.
Isumaqatigiissuteqarnikkut ingerlatseqatigiiffiup qaammatini marlunni ajornartorsiuteqarsinnaaneq anigorsinnaassavaa, sivisunerusumilli tamanna atuutissappat, nutaanik aaqqiissutissarsiortoqartariaqassasoq oqaatigineqarpoq:
- Tamanna pissappat iliuusaasinnaasunik allanik, Mads B. Christensen oqarpoq.