Skip to main content

Sulisussaaleqinerup malitsigisaanik kommunit appisaluunneqartartut

Kommunit inatsisit malittarisassallu meeqqanik atugarliortunik illersuisussat malikkuminaatsittarpaat. Ilisimatooq naapertorlugu sulisunik ilinniarluarsimasunik amigaateqartoqarneranut tamanna pissutaalluinnarpoq.

Ukiorpassuit ingerlaneranni nalunaarusiarineqartartuni kommunit Inatsisartuni politikkerit inatsisiliaannik malinnissimanngitsut allaaserineqaraangata, kommunit kikkut tamarmik oqallinneranni appisaluunneqartarput.

Tamanna Ombudsmandip ukiumoortumik nalunaarusiaa Inatsisartut sapaatip-akunnerani matumani oqaluuserimmaasut allaanerunngilaq. Nalunaarusiami ilaatigut saqqummiunneqarput, suliani arlalinni kommunit isumaginninnerup iluani inatsimmik malinnittarsimanngitsut. 

Tamanna Inatsisartuni politikkerit arlallit pakatsinerannik nassataqarpoq.


Sermitsiaq.AG-p Ilisimatusarfiup Issittumi Atugarissaaneq pillugu Ilisimatusarfiani pisortaq Steven Arnfjord aperisimavaa, kommunit tassunga atatillugu ajornartorsiuteqartarnerat sooq utikattuunersoq:

- Isumaginninnermut inatsit naapertorlugu, meeqqat innuttaasullu allat tapersersorneqarnissaat anguniarlugu, kommunit ilisimasalittut malitseqartitsillutillu iliuusissanik pilersaarusiortussaapput. Tamannali anguneqassappat ilinniarsimasunik sulisoqartussaavoq, ilinnarsimasunilli sulisussaaleqisoqarpoq, Steven Arnfjord oqarpoq.

Inatsit paasiuminaattoq piumasaqaatitalik

Ilisimatuup itisilerlugu oqaatigaa, illoqarfinni anginerusuni, soorlu Maniitsumi Sisimiunilu minnerunngitsumillu Tunumiittumi Tasiilami sulisussaaleqisoqartoq. Najugaqarfinnili mikinerusuni tamanna suli ajornartorsiutaanerusoq oqaatigaa.

Inatsit nutaaq immaqalu paasiuminaatsoq atuutsinneqalissappat ilinniarsimasunik amigaateqarneq ajornartorsiutaalissaaq. Nuna tamakkerlugu politikkerit ukiuni kingullerni meeqqanut inatsit nutaaq aamma inuit innarluutillit ikiorserneqarnissaannut inatsit nutaaq atuutsilernikuuaat.

Steven Arnfjordip oqaatigaa, inatsisit pappialatigut anguniagaqarfiulluarlutillu siuariarfiusimasut. Kommunilli inatsisinik malinnikkuminaatsitsinerat saqqummiunneqartuartillugu, Inatsisartuni politikkerit kusanartunik inatsisiliornermikkut akisussaaffimminnik qimarratiginnissinnaanngillat:

- Matumani aaqqissuussaasumik innarliisoqartartoq oqaatigineqarsinnaavoq. Politikkikkummi aaqqissuussaaneq innuttaasut naammaginartumik ilinniagaqarneq ajornerannut pisooqataavoq, ilinniagaqarnikkummi atugarissaartuuneq qaffanneqarlunilu assersuutigalugu najukkani inuiaqatigiit kivinneqartussaammata.

Inuuneq naallugu ilinniagaqartarnissaq pisariaqartoq

Steven Arnfjordip itisilerlugu oqaatigaa, inersimasutut ilinniagaqarnermi ilinniartitseriaatsimut assigusumik ilinniartitsinissaq ukkatarineqartartoq. Soorlu inuit sulinngiffeqarneranni atuakkanik atorniartarfiit ammaneranni internetsi aqqutigalugu ilinniagaqartoqarsinnaasoq.

- Inuuneq naallugu ilinniagaqartarnissap qitiulluinnartariaqarnera ukkatarineqartariaqarpoq, taanna oqapoq, nangillunilu:

- Illoqarfinni mikinerusuni sulisussaaleqinermik isumaginninnermilu sulisinnaasutut piginnaasalinnik sulisussarsiortarnermi sulisoqaannarniarnermilu ajornartorsiutigineqartartut aaqqiiffigineqanngippata, kommunini suliarineqartartut aaqqiissutaagallartuaannassapput, Steven Arnfjord oqarpoq.


Ombrudsmandip nalunaarusiaa Inatsisartuni oqaluuserineqarmat Naleqqameersoq Jens Napaattooq ilaatigut oqarpoq:

- Nalunaarusiani nalunaarutigineqartartut utikattuupput.

Ilinniartitaanerup aaqqissuusseqqinnissallu ukkatarineqarnissaat inassutigineqartoq

- Atuarlugu ilungersunartuuvoq, nalunaarusiarlu ukiut tamaasa tusaatissatut tiguneqartarluni. Pimoorunnerullugu tigusariqalerparput, Jens Napaattooq oqarpoq.

Politikkerit utikattunik atuartarnertik qattuppassuk, Steven Arfjordip siunnersuutigaa, politikkerit imaaliinnaq aaqqitassaanngitsoq suliaralugu aallartittariaqaraat:


- Inatsisartuni politikkerit amerlasuut politikkeritoqaapput ukiorpassuarni peqataasimasut, Ajornartorsiutaasut ilisimalluarpaat.

- Aaqqiissutissaasut tassaapput ilinniartitaaneq aamma isumaginnittoqarfimmut aningaasanik amerlanerusunik tapiissuteqarluni isumaginnittoqarfimmik nutarterinissaq, innuttaasut suliffissaqanngitsut piitsuujuartutut inuussanngippata. Tamanna imaaliinnaq aaqqiiffigineqarsinnaanngilaq. Politikkikkut eqqumaffigineqartuartariaqarpoq, Steven Arnfjord oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER