Sulisussaaleqineq: Meeraaqqerivinnut allatsittarneq unitsikkallarneqarpoq
Nuup Qinnguani meeqqeriviit sulisussaaleqiffiusupilussuupput. Taamaammat ingerlatsivimmit meeqqat meeqqerivimmi inissaqalernissamut allatsittarnerat qaammatini tulliuttuni marlunni unitsikkallarneqarpoq.
Nuup Qinnguaniittumi Nukariinni meeraaqqeriviit sisamat meeqqeriviillu sisamat sulisukippallaarnerat, angajoqqaat qitorneqqammersut meeqqaminnik meeraaqqerivimmut allatsitsisarnerannut kingunerluuteqarpoq.
Nukariit meeqqanut katillugit 128-nut inissaqarpoq, sulisullu 29-usussaallutik. Meeqqerivik taamaalilluni Nuummi meeqqeriviit anginerusut ilagaat.
Kommuneqarfik Sermersuumi Meeqqanut Atuarfeqarnermullu Ingerlatsivimmit immikkut aalajangerneqarsimavoq, meerarpassuarnik isumaginnissinnaasunik sulisussaaleqivallaarnera pissutigalugu, meeqqat nutaat allatsinneqartarnerannik unitsitsigallartoqassasoq.
Qaammatini marlunni unitsitsigallarneq
Kommuneqarfik Sermersuumi attaveqartarnermut pisortap Lars Damkjærip tamanna Sermitsiaq.AG-mut uppernarssarpaa.
Meeqqat allatsereersimasut suli utaqqisut allattorsimaffianniitinneqassapput, meeraaqqerivinni suli tiguneqarsinnaassallutik.
Meeraaqqerivinnut allatsittarnerup unitsikkallarneqarnissaa sapaatip-akunnerani kingullermi aalajangiunneqarpoq, sivisunerpaamillu qaammatini marlunni atuutissalluni. Lars Damkjærilli ilisimatitsissutigaa, sulisoqarniarnikkut taamatut inissisimasoqarnera oktobari naanngitsoq pitsaanerulersinneqassappat, allatsittarneq siusinnerusukkut atuutsinneqaqqilersinnaasoq.
Meeqqerivimmut ataasiinnarmut atuuttoq
- Allatsittarnerup unitsikkallarneqarneranut tunngaviuvoq, ulluunerani meeqqerivinni sulisut amigarpallaarnerat. Allatsittarnermillu unitsitsigallarneq meeqqerivimmut ataasiinnarmut atuuttoq, Lars Damkjær ilisimatitsivoq.
Kommunimit ilisimatitsissutigineqanngilaq, sulisut amerlassusissaat naammassiniarlugu meeqqerivinni sulisussanik qassinik amigaateqartoqarnersoq.
Attaveqartarnermut pisortap ilisimannginnerarpaa, Nuup meeqqeriviini allani siusinnerusukkut allatsittarnermik unitsitsigallartoqarsimanersoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...