Sulisussaaleqineq: Kommuni akissarsiat 70-t procentimik qaffassallugit isumaqatigiissuteqartoq
Avannaata Kommunia sulisuminut SIK aqqutigalugu akissarsiaqartunut isumaqatigiissusiorpoq, ingerlatsinermilu sulisuusut akunnermusiaqartut akunnermut 103 korunimik akissarsiaqartut akunnermut 175 koruunimik akissarsiaqartinneqalissapput.
Avannaata Kommunia nunaqarfinni eqqagassalerisoqarniarnermi ilungersunartorsiorpoq, suliassaqarfimmilu sulisussaaleqineq ajornartorsiummik anginerulersitsivoq.
Kommuni naapertorlugu akissarsiat pissutaaqataallutik innuttaasut aalisakkerivinni sulerusunnerupput imaluunniit aalisarusunnerullutik. Taamaattumik kommuni SIK-mut akissarsiat pillugit nutaamik isumaqatigiissusiorpoq.
Isumaqatigiissummi nutaami qulakkeerneqarpoq akissarsiat 70 procentimik qaffaavigineqarnerat.
Akunnermut akissarsiat 103 koruuniniit 175 koruuninut qaffanneqassasut, kommunalbestyrelsep tallimanngornermi ataatsimiinnermi oqaluuserisassaani atuarneqarsinnaavoq.
- Tamanna sulisussanik nutaanik aggersaanissamut, kiisalu atorfeqareertuusunik taakkuninnga attassinissamut kommunimut pitsaanerusumik periarfissiissaaq, kommunemi ingerlatsivik allappoq innersuussutigalugulu akissarsianik qaffaanissaq kommunalbestyrelsep akuerissagaa.
Politikerit ilanngullugu akuersissutigissavaat immikkoortortaqarfik 470.000 koruuninik immikkut aningaasalerneqassasoq, akissarsianut qaffaatinut atungassanik. Immikkoortortaqarfik immikkut aningaasaliiffigineqareernikuuvoq.