Sulisussaaleqineq imatut nungutissavaat

Aasaanerani suliartortitsilluni iluatsippallaanngitsumik misileereernerup kingorna Royal Greenlandip Paamiuni, Qasigiannguani Uummannamilu tunisassiorfinni tunisassiornerit pitsaanerulersinnissaannut periarfissat nutaarluinnaat aqqutiginialerpai. Aasaanerani tikisitat qulingiluat atorfinikkusullutik kissaateqarsimasut saniatigut Royal Greenlandip sulisut 85-it, tassalu Uummannami 25-t, Paamiuni 35-t aammalu Qasigiannguani 25-t atorfissaqartippai.

- Aasaanerani tikisitat amerlanersaat aasaq manna uatsinni sulisimasut ajoraluartumik sulinermik sungiusimasaqanngillaq, taamaammat suleqatigiisitami naliliivugut ingerlariaqqittariaqarluta misissorlugulu, pitsaanerusumik tunisassiorsinnaanissamut aammalu Naalakkersuisut ataavarnerusumik tunisassiortoqarnissaanik kissaataannut naapertuuttumik periarfissat suut aallartissinnaanerlutigit. Sulisussanik amigaateqartarneq qaangerneqarluinnartariaqalerpoq, Søren Olsen Damgaard, Sulisoqarnermi Pikkorissaasarnermilu Ingerlatsisoq oqarpoq.

Suleqatigiisitaq periarfissat arlallit imminut akilersinnaanerusussarsiorfigalugit maanna misissuilerpoq, ilaatigullu aningaasartuutissanut tunngasortai aalajangernissamut apeqqutaajumaarput. Periarfissanit arlaqartunit pingasut misissuivigineqartussat tassaapput nunaqarfinni illoqarfinnilu najukkameersunik atorfinitsitsisinnaaneq, najugaqarfinnit allanit atorfinitsitsisinnaaneq kiisalu nunatta avataaneersunik atorfinitsitsisinnaaneq. Periarfissat arlariiuusut ataatsimoortillugit aamma qinerneqarsinnaapput.

- Najugaqarfinni sulisunik amigaateqarfitsinni suliffissaaleqisoqangaatsiarpoq, kisianni sumiiffinni atorfinitsitsigaangatta ineriartornissamut ajoraluartumik aporfiunerpaasarpoq suliffimmik paarsilluarsinnaasannginneq, taamaammat periarfissat allat qissimigaalerpagut, soorlu avataanit tikisitsisinnaaneq. Aalisakkanik tunisassiorfinni sulisussanik nunanit allaneersunik tikisitsisarneq takornartarineqanngilaq. Nunani avannarlerni tamanna atugaasorujussuuvoq, immaqalu uagut aqqut taanna qinertariaqalissavarput, Søren Olsen Damgaard oqarpoq.

Aasaanerani suliartortitat aalajaatsut pikkorissullu 2013-imi atorfeqarsimasut salliullugit atorfinivinnissaannik neqeroorfigineqassapput. Imminut akilersinnaanerusussarsiorluni periarfissaasinnaasunik toqqaanissaq apeqqutaatillugu illoqarfinni pingasuusuni tamani immikkut qulinik aallaqqaammut atorfinitsitsisoqarallassaaq. Sinnerilu periarfissaqaleriarpat atorfinitsinneqassapput.

Suleqatigiisitap inuttarai suliffeqarfissuarmi tunisassiornermut pisortaq Lars Nielsen, pisortap tullersortaa Malik Hegelund Olsen, aqutsiveqarfinni ingerlatsisut Sten Sørensen aamma Niels Ole Møller kiisalu Sulisoqarnermi Pikkorissaasarnermilu Ingerlatsisoq Søren Olsen Damgaard.