Sulisunut inissiaq akisoorujussuaq
Perorsaasoq siorna Sisimiunit Nuummut nuuppoq, utimulli nooqqiinnalerpoq sulisunut inissiamut innersuussutigineqartumut ineqarnermut akiliut 9.000 koruunit sinneqarmat.
Nukannguaq Lynge Andersen siorna ilaquttani ilagalugit Sisimiunit Nuummut nuuppoq, Nuummi ulluunerani paaqqinnittarfiit ilaanni perorsaasutut atorfinikkami. Ilaqutariit, ataataq, anaanaq meeqqallu marluk, aallaqqaammut najugassarigallagassaminnut inissinneqarput, siornalu decembarimi Iserit A/S aqqutigalugu sulisunut inissiamik tunineqarlutik.
Maanna, ukiup affaa qaangiuttoq, Nukannguaq Lynge Andersen ulluunerani paaqqinnittarfimmi suliffimminit nuannarisaminit soraarluni Sisimiunut utilerpoq, ineqarnermut akiliutip qaffasinnerujussua pissutigalugu aningaasaqarnertik ataqatigiissikkuminaatsikkamikku.
– Suliffiga nuannarigaluaqaara aammalu pisortama suleqatimmalu nuannarigaluarpaannga, maanili Nuummi aningaasaqarniarnikkut unamminaqimmat qaammatip tulliani Sisimunut uteqqinniarluta aalajangersimavugut. Ineqarnermut akiliuterput 9.000 koruunit sinneqarpoq, tamatumalu saniatigut innaallagissamut 3.000 koruunit missaannik akiliisarluta. Torsuusami uffarfimmilu naqqit kiassagaapput, tamannalu pissutaagunarpoq qaammatit tamaasa innaallagissamut taama angitigisumik akiliisarnitsinnut, Nukannguaq Lynge Andersen oqaluttuarpoq.
Inissiamik paarlaassiniaraluarput
Sulisunut inissiaq najugaqarfigisaat, malittarisassat pissutigalugit naaggaarsinnaanngisaat, 141 kvadratmeterinik angissuseqarpoq. Inissiaqarfik nutaarluinnaq, Nuup illoqarfiata immikkoortuani nutaajunerpaami Qinngutsinniippoq. Apriilimi Nukannguaq Lynge allanik inissiamik paarlaaffigisinnaasaminik ujarlilerpoq. Sukkasuumik soqutiginnittut qulingiluat nalunaarput, ineqarenermulli akiliut qanoq angitiginersoq tusaraangamikku tunuaannartarlutik.
Allaaserisaq tamakkerlugu aviisimi Sermitsiami saqqummeqqammersumi atuarsinnaavat. Aviisi uani ataani pissarsiarisinnaavat: