Sulisunut ajunngitsorsiat naammagisimaarneqanngitsut

Kommuneqarfik Sermersuumi aningaasaqarnermut ataatsimiititaliap sapaatip akunnerani kingullermi inunnik isumaginnittoqarfimmi sulisut arlallit illoqarfinni Tasiilami, Paamiuni aamma Ittoqqortoormiini sulisuuppata ajunngitsorsiaqalersinniarlugit aalajangiuppaa.

Iliuuseqarnerup sulisoreriikkat imaluunniit sulisussarsiornermi naleqquttunik piginnaasallit kajumilersinnissaq siunertaraa.

Aamma atuaruk: Sulisunut iluaqutissat kattuffiup ernummatigigai

- Taamaattumik kommunit kattuffiattut sulisut kattuffiit assigiinngitsut isumaqatigilluinnarpagut sulisunut akissarsiat ajunngitsorsiassallu kattuffiit aqqutigalugit suilarineqartuarnissaat ingerlanneqartariaqartoq, sulisorisanut periarfissat sumiikkaluaraanniluunniit assigiissinneqartuarnissaat siunertaralugu, KANUKOKA siulittaasoq Simon Simonsen, tusagassiuutinut nalunaarummi allappoq.

Equnganerusumik ingerlasoqalissasoq
- Kommunit aqunneqarnerat pillugu inatsit malillugu KANUKOKA kommunit sinnerlugit kisimi sulisunut tunngasunik isumaqatiginninniarsinnaatitaavoq, siulittaasoq naqissusiivoq, taassuma ’'nunatsinni suliffeqarnermi equngasumik ineriartorneq naligiiffiunngereersoq suli nanginneqaannarnissaa’’ ernummatigaa.

- Nuna ataasiusariaqarpoq, piffiit ataasiakkaat immikkut periarfissalersornagit, Simon Simonsen oqarpoq.

Aamma atuaruk: Sermersuumi sulisunut saniatigut ajunngitsorsiassat

Saniatigut ajunngitsorsiassat inunnik isumaginninnermut siunnersortinut, ilaqutariinnut siunnersortinut, pillorissaasunut, tarnip pissusaanik ilisimasaqartunut, siunnersortinut, utoqqarnut innarluutilinnullu peqqissaasunut isumaginninermilu siunnersortinut ikiortinut aamma perorsaasut inunnik isumaginninnermi tarnikkullu erloqissutilinnik suliaqartunut taamatullu innarluutilinnik suliaqartunut illoqarfinni pingasuni taakkartorneqartuni atuutsinneqassapput.

Sulisunut ajunngitsorsiassat uani takuneqarsinnaapput

• Sulisunik ataasiakkaanik qaammammut ataasiarluni ilitsersuisarneq + qaammat ataaseq allorlugu sulisunik tamanik ilitsersuisarneq + tassanngaannaq ajutoornermik nalaanneqarnermi immikkut ittumik ilitsersuisarneq

• Ukiumut ataasiarluni akeqanngitsumik angalatitsisarneq

• Sapaatip akunneranut ataasiarluni sulisut tamarmik nalunaaquttap akunnerani ataatsimi eqaarsaatinneqartarnerat imaluunniit sapaatip akunneri tamaasa CSR-imut nalunaaquttap akunnerani ataatsimi peqataaneq

• Ukiumut ataasiarluni Nuummut paasisassarsiorneq, pisariaqartinneqarpallu Danmarkimi kommunit ilaanni suleqatinik suliamut tunngasunik paarlaasseqatigiinneq imaluunniit sullivinnik paarlaateqatigiinneq

• Killissaleriikkamik atorfinitsitsinermik neqerooruteqarneq (ajornanngippat aningaasanik ukiumut ataasiarluni tigusartagassnik neqerooruteqarluni)