isumaginninneq
Sulisunut ajunngitsorsiassat kattuffiup ernummatigigai
Kommuneqarfik Sermersuup nammineerluni sulisunik kajumilersitsiniarluni ajunngitsorsiassanik amerlanerusunik pilersitsinera, Atorfillit Kattuffiata (AK) qiimmatsaatiginngilaa. Ajornartorsiut kommuninut allanut ingerlateqqinneqaannassaaq, kattuffik isumaqarpoq.
Isumaginnittoqarfimmi Tasiilami, Paamiuni aamma Ittoqqortoormiini sulisut ilaatigut akeqanngitsumik angalanissamut saniatigut ajunngitsorsiaqarnissaat Sermersuup qulakkeerniarpaa.
Maanna sulisut aamma sulisunngortussat uku ajunngitsorsiat pissarsiarisinnaavaat:
- Sulisunik ataasiakkaanik qaammammut ataasiarluni ilitsersuisarneq + qaammat ataaseq allorlugu sulisunik tamanik ilitsersuisarneq + tassanngaannaq ajutoornermik nalaanneqarnermi immikkut ittumik ilitsersuisarneq
- Ukiumut ataasiarluni akeqanngitsumik angalatitsisarneq
- Sapaatip akunneranut ataasiarluni sulisut tamarmik nalunaaquttap akunnerani ataatsimi eqaarsaatinneqartarnerat imaluunniit sapaatip akunneri tamaasa CSR-imut nalunaaquttap akunnerani ataatsimi peqataaneq
- Ukiumut ataasiarluni Nuummut paasisassarsiorneq, pisariaqartinneqarpallu Danmarkimi kommunit ilaanni suleqatinik suliamut tunngasunik paarlaasseqatigiinneq imaluunniit sullivinnik paarlaateqatigiinneq
- Killissaleriikkamik atorfinitsitsinermik neqerooruteqarneq (ajornanngippat aningaasanik ukiumut ataasiarluni tigusartagassnik neqerooruteqarluni)
Maanna isumaqatigiinniarnerit ingerlanneqartut ajorseriartinneqarsinnaanerat kattuffiup ernummatigaa, tusagassiuutinullu nalunaarummi allappoq:
- Tamakku sulisunik suliassanut piginnaasalinnik amigaateqarnermi pitsanngorsaalluni iliuuseqarniarnerni siunertamittut atuutilernissaat anguniarlugit iliortoqassasoq, kommuni ataatsip kisimi iluaqutissarinngisaanik kommuninulli allanut aamma taamatut ittunik ajornartorsiutilinnut tamanut iluaqutaasussanngortillugit naqissuserusuppara, Atorfillit Kattuffianni siulittaasoq, Dina Olsen oqarpoq, iliuuseriniakkat soqutiginartut taanna isumaqarpoq, kisianni qitiusumik isumaqatiginninnermiittariaqartut.
Atuaruk: Sermersuumi sulisunut saniatigut iluaqutissat
- AK-p matumuuna mianersoqqussutiginiarpaa kommunit ataasiakkaat nammineerlutik ataasiakkaarlutik ajornartorsiutiminnik isumaqatigiinniartarnermik ingerlatsisut avaqqullugit iliuuseqarniartarnissaat, Dina Olsen oqarpoq.
Nuup avataani isumaginnittoqarfinni sulisut sulisoriinnarnissaannut pissarsiarinissaannullu ajornartorsiortoqartoq, kattuffiup siulittaasuata nassuerutigaa.
AK: NAalakkersuisut akisussaasuupput
Maanna taamatut inissisimasoqarneranut ukiuni arlalinni akissarsiatigut killilersuivallaartumik eqarpallaartumillu Naalakkersuisut ingerlatsinerat akisussaaqataasoq, taassuma naqissuserpaa.
Ilaqutariinnut siunnersortit, pillorissaasut, tarnip pissusaanik ilisimasaqartut, siunnersortit, utoqqarnut innarluutilinnullu peqqissaasunut isumaginninermilu siunnersortinut ikiortit aamma perorsaasut inunnik isumaginninnermi tarnikkullu erloqissutilinnik suliaqartut taamatullu innarluutilinnik suliaqartut, illoqarfinni taakkartorneqartuniittunut ajunngitsorsiassat tutsinneqassapput.