Sulisitsisut: Piumasaqaatit niuffaffiit aalalajangersagaraat
Inuussutissalerinermik oqartussaaffiup angerlaanneqarnissaa qinigaaffimmi matumani pissasoq naalakkersuisooqatigiit isumaqatigiissutigaat. Suliniummut nunatsinni Sulisitsisut (GE) immersueqataarusuppoq, taamaattorli erseqqissaatigineqarpoq piumasaqaatit suut naammassineqassanersut niuffaffiit namminneq aalajangersortaraat.
Inuussutissalerinermut tunngatillugu oqartussaaffiup nunatsinnut angerlaanneqarnissaanik naalakkersuisooqatigiit pilersaarutaat pillugu Aalisarnermut Piniarnermullu Naalakkersuisoq Aqqaluaq Biilmann Egede (IA), nunatsinni inuussutissarsionermik ingerlataqartut qanoq isumaqarnersoq paaserusullugu aviisimi matuma siornani ujartuisoq, aviisi Sermitsiaq allappoq.
Nunatsinni sulisitsisut peqatigiiffianni GE-mi pisortaq, Christian Keldsen tassunga tunngatillugu erseqqissaavoq assut pingaaruteqartoq nunatsinni inuussutissarsiornermik ingerlataqartut akuutinneqarnissaat, taannalu Naalakkersuisunut siunnersuuteqarpoq suleqatigiissitamik pilersitsisoqassasoq oqartussaaffiup angerlaanneqarsinnaanera pillugu qulaajaasussamik:
- Kalaallit Nunaannit avammut nioqqutigineqartartut tamangajammik inuussutissanut tunngassuteqarput (aalisakkat qaleruallillu, aaqq.) taamaammat uagutsinnut assut pingaaruteqarpoq inuussutissalerinermut oqartussaaffiup angerlaanneqarsinnaanera pillugu suliniummut atatillugu sapinngisamik annerpaamik sunniuteqaqataasinnaanerput, pingaartumik aamma politikkikkut suliniummi tassani immikkut eqqumaffigineqartariaqartut iliuuseqarfigisariaqakkallu pillugit. Erseqqissaatigissavarali piumasaqaatit suut inuussutissalerillutik inuussutissarsiornermik ingerlatsisut naammassisassarineraat pillugu niuffaffiit tamanna aalajangersartarmassuk, taamaammallu oqartussaaffiup angerlaanneratigut piumasaqaatit qasukkartinneqarsinnaanerannik kinguneqarsinnaanissaa naatsorsuutigineqarsinnaanngimmat, Christian Keldsen Sermitsiamut oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: