Skip to main content

Sulisitsisut: Killilersuutit assigiissarneqanngillat

Coronamut killilersuutit sakkortuumik eqquisut, Kalaallit Nunaanni Sulisitsisut isumaqarput.

Naalakkersuisut coronavirusip tuniluunnera killilersimaarniarlugu killilersuutit atuutsiligaat Kalaallit Nunaanni Sulisitsisunit isornartorsiorneqarput.

Sulisitsisut naapertorlugit, killilersuutit sukangavallaarput suliffeqarfinnullu aamma sulisunut annertoorujummik ajoqusiillutik. Sulisitsisut isumaqarpu, Covid-19-ip inooqataaffigineqarnissaa ilikkartariaqaripput:

- Pingaaruteqarpoq iliuuserineqartoq naleqqusassallugu, taamaasilluta killilersuinerit sakkortuut aqqusaaqqinnginniassagatsigit aamma puigussanngilarput inuttut, socialimut tunngasunut aningaasarsiornikkullu kingunerisinnaasai, iliuutsip kingunerinik. Nassuerutigissavarput, inuiaqatigiittut COVID-19 inooqataaffigissallugu ilikkartariaqaratsigu, Sulisitsisuni pisortaq Christian Keldsen tusagassiorfinnut nalunaaruteqarnermi taama oqarpoq.

Killersuutit

Najugaqarfiit uku maannakkorpiaq tunillaassuisutut ilisimaneqanngitsunit tuniluuffigineqarput, taamaammallu immikkut killilersuiffigineqarlutik:

Aasiaat, Ilulissat, Kangerlussuaq, Maniitsoq, Narsaq, Nuuk, Qasigiannguit, Sisimiut, Upernavik, Tasiusaq, Upernavik Kujalleq, Nutaarmiut, Nuussuaq, Innaarsuit, Naajaat, Aappilattoq, Kangersuatsiaq, Kullorsuaq.

Pissarsiffik: Nunatsinni Nakorsaaneqarfik

Illoqarfinni nunaqarfinnilu arlalinni tunillaassuisutut ilisimaneqanngitsunit tunillaassusoqarnera pissutigalugu maannakkorpiaq killilersuisoqarpoq. Killilersuutini pineqarput, inini kikkut tamarmik iserfigisinnaasaanni isersimasut killeqartinneqarnissaat, coronapassimik atuisarnissa aamma qanermut assiaqummik visirimilluunniit atuinissamut piumasaqaateqarneq. 

Naalakkersuisut taakkua saniatigut nunami tamarmi sassaallertarfiit ullut tamaasa unnukkut quliniit ullaakkut tallimat tungaanut matoqqasarnissaat aalajangersimavaat.

Nunatsinni Nakorsaaneqarfimmit pingasunngornermi nalunaarutigineqarpoq, inuit tallimat coronaviruseqarlutik uninngasut tallimaasut kiisalu ullormi kingullermi tunillatsissimasut utaat 457-it nassaarineqarsimasut. Tassa inuiaqatigiinni tuniluuttoqangaatsiarpoq, Sulisitsisulli isumaqarput, matusineq inuussutissarsiutilinnut annertoorujussuarmik kingunerluuteqassasoq:

Sassaallertarfiit matuneqarnerat annernartoq

- Killilersuutit inuussutissarsiornermik ingerlatsisunut aamma sulisuinut kinguneqarpoq, eqqugaajuartunut pisortat ikiorsiissutaat annaasanut naleqqiullugit naammanngillat. Suliassaqanngippat, taava suliffissat atuutitiinnarneqarsinnaanngillat, Christian Keldsen oqarpoq.

Taassuma ilanngullugu oqaatigaa, imerniartarfinnut killilersuutit siunertamut naapertuutinngitsut, meeqqammi akornanni corona aamma tuniluummat, meeqqallu akornanni tuniluuttoqarnear killilersuutinit annikillisinneqarsimanngimmat.

Christian Keldsenip Sermitsiaq.AG-mut itisiliilluni oqaatigaa, sassaallertarfiit matuneqarnerat ingerlatsisunut annernartuusoq, aamma sulisitsisunit isornartoqartinneqarpoq, matusinerup sullitakkat tamaasa, akiuussutissalerneqarsimappata akiuussutissalerneqarsimanngippatalu eqqorai. Sulisitsisunit oqaatigineqarpoq , suliffeqarfiit matusinermit eqqugaasut taarsiiffigitinneqarsinnaanerat aamma inissinneqarsimanngitsoq.

Misissueriaaseq nersorneqartoq

Pisortaq killilersuutinut naammaginninngikkaluarluni isumaqarpoq, misissueriaatsip allanngortinneqarsimanera inissaminiittoq. Naalakkersuisut tassunga atatillugu nalunaarutiginikuuaat, innuttaasut ersiutillit aamma uummatimikkut puammikkullu nappaatillit, innuttaasut imminnut misissornerminni tunillatsissimallutik paasisaqartut innuttaasullu annertuunik ersiutillit kisimik misissorneqarsinnaasut.

- Misissortinnissamut iliuusissami nutaami kikkut eqimattat piniarneqartut, kingunerisassai sunniutaallu isiginiarneqarput, taassumalu qularnanngitsumik takutikkumaarpaa tamanna inuiaqatigiinnut annertuumik iluaqutaassasoq, Christian Keldsen oqarpoq, nangillunilu:

- Taamaattumik Sulisitsisut sakkortunerpaamik kaammattuerusupput, siumut isigaluni misiliinermut iliuusissiaq assigalugu qulakkeerniassallugu assigiinnerusumik iliuuseqarnissaq aamma killilersuinerit sunniutaat ukkanneqassapput taamaasilluni inuiaqatigiinnut sunniutaasa kingunerinut naluqqussarlugit, taassuma ataani inunnut takkununnga, suliffimminniit maannakkut angerlartinneqartunut.

Sumiiffik alla killilersuutinik sakkukilliliinissamik aalajangiiffiusimasoq tassaavoq Danmarki. Danmarkimi naalakkersuisut pingasunngornermi ualikkut tusagassiortunik katersortitsinerminni nalunaarutigaat, Danmarkimi killilersuutit arlallit piffissami aggersumi sakkukillineqassasut. Tamatumunnga pissutaanerpaalluni, allannguut omikron siullermik annilaanngateqarsimanermut sanilliullugu Danmarkimi napparsimmavinnut unitsitsivallaarsimannginnera.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER