Sulisitsisut: Coronamut tunngatillugu killilersuineq naapertuutinnglaq

Kalaallit Nunaanni Sulisitsisut paasiuminaatsippaat, Kalaallit Nunaanni corona tuniluutinngitsoq sooq Namminersorlutik Oqartussat killilersuutit ilaannik ukiup nikinnera ilanngullugu sivitsuisimanersut.

- Sulisitsisut peqqinnissamut tunngatillugu nalilersuutigineqartoq killilersuinerit
sivitsorneqarnerat assut paasiuminaatsippaa, akuerineqarmatami, nammineerlutik aamma
politikkikkut aaqqissuussat nuna tamakkerlugu peqataaffigineqartut kommuninit
assigiinngitsuniit ingerlanneqarsinnaammata. Kisianni soorlu assersuutigalugu killilersuinerit isumaqarput, inuk Aasianneersoq ataaseq Ilulissanut pikkorissariarnissamut
peqataasinnaanngimmat – imaluunniit kommunini allani – illuatungaanili
Upernavimminngaaneersut Uummannaminngaaneersullu Ilulissani peqataasinnaammata, Kalaallit Nunaanni Sulisitsisut pisortaat Brian Buus Pedersen tusagassiorfinnut nalunaaruteqarluni allappoq.

Akiliisinnaajunnaartorpassuaqarnissaanik ernummateqarneq

Taassuma ernummatigaa, killilersuinerit akunnittarfinnik neriniartarfinnillu ingerlatsisut, ukiakkut pikkorissartitsisoqarneranit, isumasioqatigiittoqarnerani assigisaannillu pisoqartarneranit iluaquteqarnialeruttortut akornanni akiliisinnaajunnaartorpassuaqarsinnaanera.

- Tamatuma saniatigut unnuisarfinnik ingerlatsisut juullilernerani nereqatigiittarnernut
tunngatillugu septembarimi neqeroorutinik nassiussuiffigisarpaat. Tamanna aaliangiisuusumik kaaviaartitanut annertuumik sunniuteqartarpoq, tassami upernaaq aasarlu annertuumik eqqorneqaatigereersimavaat, nalinginnaasumik juullilernerani peqatigiittarnernut neqerooruteqarnissamik periarfissarigaluaramikku aamma sammineqarsinnaasut allat, ukiuunerani juullillu qaammataanut attuumasutilinnut. Kaaviiaartitsineq tamanna katersuussinnaanernut tunngatillugu aamma eqqorneqarpoq, inimi ataatsimi qanoq amerlatsigisut katersuussinnaaneri eqqarsaatigalugit, Brian Buus Pedersen allappoq nangillunilu:

- Sulisitsisut annilaanngatigivaat, killilersuinerit eqqarsaatigineqartut ataatsimut sunniutissaat, piffissami sivisuumi ajornartorsioreernerup kingorna, unnuisarfinnut imaluunniit neriniartarfinnut akiliisinnaajunnaarnermik kinguneqarsinnaanerannut, minnerpaamik aningaasatigut ikiorsiissutinik pilersitsisoqanngippat, suliffeqarfinnut nalinginnaasumik ingerlatsinissamik periarfissatigut killilersuinerit uninnissaata tungaanut.

Namminissarsiortoqarpallaartoq

Brian Buus Pedersenip paasisinnaanngilaa, sooq namminersorniarpallaarluni iliuuseqartoqartarnersoq. Soorlu Kim Kielsen killilersuutit aalajangiiffigitinnagit, kattuffinnik peqataatitserusussimanngitsoq.

- Taamaattumik manna tikillugu coronamut iliuutsinut tapersersuineq annikillisissinnaavaa, tamannalu sianiilliorneruvoq, Sulitsisisut pisortaat erseqqissaavoq.

Powered by Labrador CMS