aatsitassarsiornermi ajornartorsiutit

Sulisitsisut Tanbreezip itigartinneqarnera eqqumiigigaat

Sulisitsisut Naalakkersuisut Tanbreezimut qanittukkut itigartitsinerata Kalaallit Nunaata aningaasaqarneranut ajoqusiisinnaanera ernummatigaat

Aatsitassarsiornissamik suliniummit assilisaq

Tanbreezip Kujataani Killavaat Alannguanni aatsitassanik piiarneqartussanik 0,5 million tonsiniit 1,5 millioner tonsinut qaffaaniarluni kissaataanik Naalakkersuisut septembarip 3-ani tusagassiuutitigut nalunaarummi itigartitsinerat Sulisitsisunik annertuumik ernumalersitsivoq.

- Qularutissaanngilaq tamanna Kalaallit Nunaanni aningaasaleerusussutsimut iluaqutaanavianngitsoq. Itigartitsinerup avammut oqariartuutaata pingaassusia ernummatigaara, tamanna Kalaallit Nunaanni suliffissanik akileraarutitigullu isertitassanik annaasaqarnermik kinguneqarsinnaammat, Thomas 'Tyt' Mogensen, Sulisitsisuni aatsitassanut sanaartornermillu ingerlatsisunut ataatsimiititaliami siunnersortaallunilu allattaasoq, oqarpoq.

Nutaamik qinnuteqassasoq

Itigartitsisoqarneratigut Tanbreez nutaarluinnarmik qinnuteqaasiussaaq suliarlu taama ittoq maannamut ukiut sisamaata affaanik sivisussuseqarsimavoq, Tanbreez saffiugassanik 0,5 million tonsinik tunisassiorniarluni qinnuteqaatini siulleq marsip 12-ani 2012-imi nassiussimammagu.

- Aallaqqaammut qinnuteqaat tunngavigalugu ingerlaqqittoqannginnera eqqumiiginarpoq, akerlianilli aallaqqaataaniit aallartittoqarluni. Ukiuni pingasuni affarmilu suliamik suliarinnittoqarnera ajornartorsiuterujussuuvoq, Thomas 'Tyt' Mogensen oqarpoq. Taanna erseqqissaalluni oqarpoq, aatsitassarsiornermi suliniutit piffissalerneqartartut malinneqartariaqartunik.

- Suliarineqarnera sivisunaarpat piffissaliussaq aatsitassarsiornermi suliniummik soqutiginarsisitsisoq qaangerneqaratarsinnaavoq, aatsitassarsiornermik suliaqarfimmi pissutsit allanngulertortarmata. Taamaattumik piffissaq aarlerinaammik nalilersuinermut ilaavoq, tamannalu suliffeqarfinnit tamanit suliarineqartarpoq taamaattumillu suliffeqarfiit Kalaallit Nunaanni ingerlatanik suliaqartillugit suliarineqanera sivisooq aarlerinaammik nalilersuinermik annertunerulersitsisinnaalluni, nangilluni oqarpoq.

Aatsitassarsioqatigiiffiup pissutsit maanna atuuttut qanoq isumaqarfiginerai Naalakkersuisullu isornartorsiuinermut qanoq isumaqarnersut Sermitsiami normu 37-mi atuakkit.

Aviisi najukkami pisiniarfimmi pisiarisinnaavat imaluunniit ingerlariaqqiffissaq allaaserisap matuma ataaniittoq atorsinnaallugu.

Aamma atuakkit: Tanbreezip qinnuteqaataa akuerineqanngilaq

Aallaqqaataaniit sulisoqaqqittariaqalersoq

Powered by Labrador CMS