Sulisitsisut siunnersuut pillugu: Isertitassammi?

Naalakkersuisut inatsisissatut siunnersuumminni qanoq isertitaqarnissaq pinnagu aningaasanik atuinissaq ukatarinerugaat Sulisitsisut isumaqarput.

Kalaallit Nunaanni Sulisitsisut (GE) Naalakkersuisut aningaasanut inatsisissatut siunnersuutaat sapaatip akunnerani kingullermi saqqummiunneqartoq arlalitsigut nersualaarpaat.

Nersualaarneqartut tassaapput ilinniarsimasunik sulisoqarnissamik pisariaqartitsineq, piujuaannartitsinissamut inerisaanissamullu pilersaarut, aalisarneq pillugu ataatsimiititaliarsuup innersuussutaannik malinnikkusunneq mittarfiliornernillu ingerlatitsiinnarnissamik pingaartitsineq.

- Naalakkersuisut siunissami aningaasanut inatsisinik sinneqartoorutaasussanik siunnersuutinillu aningaasatigut nammanneqarsinnaasunik pilersitsiniarnerminni tamakkua qanoq aningaasalersorneqarnissaannik qanorlu tulleriiaarneqarnissaannik ersarissaanerat pitsaasuuvoq, Sulisitsisut pisortaat Christian Keldsen tusagassiorfinnut nalunaaruteqarnermi oqarpoq.

- Suliniutissat tallimat tamarmik aningaasartuutaassapput

Sulisitsisulli isaannit isigalugu siunnersuummi amigaateqartoqarpoq:

- Maqaasivarali ineriartornerup suminngaanneernissaa takuusinnaannginnakku. Inatsimmi immikkut suliniutissat tallimaasut qiviaannaraanni, tamarmik aningaasartuutaasussaapput aningaasanillu isertitaqaataasussaanatik.

AAMMA ATUARUK: Aningaasanut inatsisissatut siunnersuut: Naligiinnerujartorneq - maannakkuunngikkallartorli

- Inerisaaneq aningaasanullu pituttugaannginneq piumagutsigit, taava Kalaallit Nunaata sulinermik inuussutissarsiuteqarnera qitiutillugu sulisariaqarpugut, qanorlu iliuutsigut pilersaarutitsinnut naapertuuttariaqarput. Ilaatigut atuarneqarsinnaavoq aatsitassarsiorneq suli aallunniarneqartoq, massakkumulli siunnerfik atuinnarniaraanni siunissaq pitsaanngilaq, Christian Keldsen oqarpoq.

Naalakkersuisut aningaasanut inatsisissatut siunnersuummi immikkut pingaartillugit suliniutiginiagaat tallimaasut ukuupput:

  1. Naligiinnginneq
  2. Eqqumiitsuliorneq Kultureqaarnerlu
  3. Meeqqat inuusuttullu
  4. Soraarnerussutisianut utoqqarnullu tunngassuteqartut
  5. Pisinnaatitaaffinnik suliaqarfiit nukittorsarneqarnissaat, Naligiinnginnerup akiorniarneqarnera

Visit Greenlandimut aningaasaliissuteqarnissaq ujartoraa

Sulisitsisut pisortaata ilanngullugu ujartorpaa, coronap kingorna takornariartitsisarnissaq eqqarsaatigalugu nunanut allanut unammillersinnaanermut Naalakkersuisut akulerunnerusarnissaat. Ilaatigut Visit Greenlandip aningaasaliiffigineqarneruneratigut Kalaallit Nunaat pilerinarsarneqarsinnaammat:

- Tupaallaatigaarput Visit Greenlandip suliniarneranut immikkut aningaasaliisoqarnianngimmat, aammalu takuneqarsinnaammat sulinermik inuussutissarsiornerup siuarsarnissaanut tunngasut sipaarfiuniartut.

- Paasisinnaavarput suliniutit tamakkerlugit kontomut ataatsimut inissinniarneqarnerat, piviusorli tassaavoq suliffeqarfiit pineqartut ikiorniarlugit ukiunut aggersunut
aningaasaliisoqarsimanngimmat. Takornarialerineq ullormiit ullormut ilorraap tungaanut saannavianngilaq, suliffeqarfillu taannaavoq Corona pillugu killilersuisoqalermat annertunerpaamik eqqugaasimasoq, taanna oqarpoq.

Powered by Labrador CMS