Den Europæiske Union

Sulisitsisut siulittaasuat: EU-mut ilaasortanngorsinnaaneq Kalaallit Nunaata nalilersoqqittariaqarpaa

Tuluit Nunaat EU-mit aninissaq pillugu taasisitsileraluttuarpoq, tuluit tusagassiorfiisa Kalaallit Nunaat, nunani kisiartaalluni anisoq sammilerpaat. Tassanilu Sulisitsisut siulittaasuannit tupaallannartumik akineqarput

Sulisisitsut siulittaasuat Henrik Leth EU-p avataaniinnerup qanoq inneranik tuluuit tusagassiorfiinit tusarniaavigineqartunut ilaavoq. Taannalu ilaasortanngoqqikkusuppoq

Immaqa EU-mut ilaasortanngoqqinnissaq qinnutigissallugu piffissanngorpoq. Taamak Polar Seafoodip siulersuisuini Sulisitsisunilu siulittaasoq Henrik Leth tuluit tusagassiisarfissuinut marlunnut BBC-mut Daily Mailimullu oqarpoq.

- Suut pitsaaqutaanerat pitsaanngequtaanerallu misissortariaqarpavut. Ingiinnarluta EU-mi ilaasortanngoqqinnaviannginnitsinnik oqaluinnarsinnaanngilagut, Sulisitsisut siulittaasuat oqarpoq.

Nuna aninikoq kisimiittoq
Siusinnerusukkut ataasiaannarluni taamatut pisoqarpoq, 1985-imilu kalaallit 53 procentii EF-imit anissallutik aalajangerput. Qanorlu pisoqarsimanera tuluit tusagassiortuisa paaserusuppaat.

Politikeritoqqallu taamanikkut naaggaarnissamik sulissuteqartut tupaallaatigineqarsinnaanngitsumik aalajangernermik tulluusimaarutiginnillutillu iluarisimaarinnipput.

- Qaammatut tamarluinnaasa Bruxellesimukarlunga nammineq imartattinni aalisarsinnaanitsinnut tunngasunik aperiartortuartariaqartarsimavunga. Taakku nammineq pigiunnaarsimavavut. Europami ilaqutariissuarnut ilaanitsinnik, sunillu tamanik ikinngutitsinnik avitseqateqarnissatsinnik oqarfigineqartuarnerput uumillernartuuvoq, taamanikkut naalakkersuisunut ilaasortaasoq, maannalu Inatsisartut siulittaasuat Lars-Emil Johansen Siumummeersoq oqarpoq.

Taassumalu tuluit EU-mut qularuteqartut tapersersorpai, tassanilu naaggaartunut eqqissisaavoq.

Sermitsiaq-AG-p kukkusumik allakkaluarpaa, Aqqaluk Lyngep EU-mut ilaasortanngorsinnaaneq Kalaallit Nunaata nalilersoqqittariaqaraa isumaqartoq. Tamanna eqqunngilaq. Aaqqissuisoqarfiup kukkussut utoqqatsissutigaa

Allaaserisaq tamaat sapaatip-akunnerani AG-mi saqqummersumi atuaruk, taanna aamma uani pisiarisinnaavat:

Powered by Labrador CMS