Sulisitsisut RG-p ilaasortaajunnaarnera ilungersunartuunnginnerarpaat
Sulisitsisisut pisortaata Christian Keldsenip paasisinnaannginnerarpaa, pisassiissutit isumaqatigiinngissutaanerat tunngavilersuutigalugu Royal Greenlandip soqutigisaqaqatigiiffimmi ilaasortaajunnaarnera.
Royal Greenlandimi pisortaanerup Mikael Thinghuusip pisassiissutinut isummat assigiinnginnerat pissutigalugu Kalaallit Nunaanni suliffeqarfiit annersaat sulisitsisut kattuffianni ilaasortaajunnaartippaa.
Taanna Sermitsiaq.G-mut pingasunngormat taamatut nassuiaateqarpoq.
Ugguartoq
Sulisitsisut pisortaata Christian Keldsenp taamatut aalajangertoqarsimanera uggoraa, kattuffiulli sulineranut tamanna sunniuteqassangitinngilaa.
Mikael Thinghuusip ilaasortaajunnaarnermut pisassiissutit isumaqatigiinngissutaanerat tunngavilersuutigaa. Sooq tamanna Sulisitsisut isumaqarfigissavaat?
- Pisassiissutit isumaqatigiinngissutaanerarlugit nalunaaruteqarneq paasisinnaanngilara, soorlu aamma illit allattutit tamanna tunngaviatigut uagut isummerfigisimanngilarput.
Sulisitsisut pisassiissutinut tunngatillugu politikkiata allanngortinneqarnissaanik pilersaaruteqarpisi, Royal Greenlandimit ilaasortaaneq isumatusaarnerusoq takusinnaaqqilissappagu?
- Pilersaaruteqanngilagut, oqaatigineqareersutummi RG-p soqutigisaanut naapertuutinngittumik isummertoqarsimanngimmat. Sulisitsisut ilaasortatik sinnerlugit suliaqartarput, inuussutissarsiutillu assigiinngitsut pillugit ataatsimiititaliap aamma sumiiffigisami peqatigiiffinnut ataaatsimiititaliap aaqqissuussaanerat naapertorlugu suliaqartarlutik.
Suliffeqarfiup ilaasortatut annersaasup ilaasortaajunnaarnera sulisitsisunut qanoq kinguneqassava?
- Ilaasortaq ilaasortaajunnaarniaraanga uggornartuaannarpoq. Pisumi matumani Sulisitsisuni ilaasortat RG-lu namminneq soqutigisaminnik kiffaanngissuseqarnerullutik isumaginninnissamut periarfissaqalerput. Sulisitsisunut ilaasortanngortartut amerliartortut takusinnaavarput, pingaartumik ukiuni kingullerni.
Ingerlalluartoq
Royal Greenland suliffeqarfissuugami ilaasortatut annertuumik akiliuteqartarpoq. Ilaasortaajunnaarnera Sulisitsisut sipaarniuteqarnissaannik nassataqassava?
- Kattuffiuvugut ingerlalluartoq ilaasortanngortunik ilaasortaajunnaartunillu isumaginnissinnaasoq. Suliffeqarfittut ingerlatsivugut, tassa isertitassat aningaasartuutissallu ukkatarisarpavut, aamma ilaasortat akiliutissaat qummut killilernikuuagut, suliffeqarfiit ataasiakkaat sunniuteqarsinnaanerat pinngitsoortinniarlugu.
Sulisitsisut nipaat sunniuteqarsinnaanerallu ilaasortaajunnaartoqarneratigut ajorseriartinneqarpoq. Tamatumunnga qanoq oqaasissaqarpit?
- Amerlasuujulluni ataatsimoorneq pitsaanerpaajuaannarpoq. Oqaatigineqareersutut RG ilaasortaajunnaarmat, tamatta immikkut soqutigisatsinnik assigiinngitsunik isumaginninnissamut periarfissaqarpugut.
Silaannaq
Illit isummat malillugu Sulisitsisut Royal Greenlandillu akornanni "silaannaq" qanoq issimava?
- Ajunngilluinnarsimavoq. Suliffeqarfitsialaavoq assigiinngitsorpassuarnik sulialik, kattuffimmilu assigiinngitsutigut suleqatigiilluarsimavugut, soorlu RG inuussutissarsiutit assigiinngitsut pillugit ataatsimiititaliatsinni suleqataalluarsimasoq. Thinghuusilu marluulluta atassuteqaqatigiittuarsimavugut sulilu atassuteqaqatigiittarluta. Aamma taamatut aalajangernerannut atatillugu oqaloqatigiittarsimaqaagut, RG-llu ukiualuit qaangiuppata ilaasortanngoqqissinnaaneranut qilanaarpunga.