Sulisitsisut qineqqusaartitsisut

Inuit 30-t missaanniittut tallimanngormat ualikkut pingasunut Hotel Hans Eedemut takkussimapput, politikkerit inuussutissarsiornermut atatillugu isumaat tusarniarlugit.

Takkussimasulli qinersisartuunatik Sulisitsisuni ilaasortaapput. Ilaasortanit ilaatigut apeqquteqarfigineqarpoq piffissami qaninnermi akiuussutissamik kapitisissimanermut uppernassaammik passeqartoqalissanersoq, sulisitsisut aningaasaliissuteqartartunik suleqatigisartakkaminnillu naapitsiniarlutik angalasinnaaqqilernissaat anguniarlugu.

Aamma politikkerinut apeqqutigineqarpoq, suliffeqarfiit ilaasortaqarnermikkut aningaasatigut annertuumik ajornartorsiulersimasut ikiorserneqartannginnerannut (aperisup isumaa malillugu) atatillugu politikkerit qanoq iliuuseqalersaarnersut.

Najugaqavissunik sulisussaaleqineq

Qineqqusaartitsinermili sammineqarnerpaapput sulisussaaleqineq aamma inuusuttorpassuit ilinniagaqanngitsut imaluunniiit suliffeqarfiit sulisussaaleqineranni suliffeqanngitsut.

Partiit ilaasa qineqqusaarnerminni avataanit sulisussanik tikisitsisarneq unitsikkusuppaat, tunngavilersuutigalukku najugaqavissut tassaasut suliffinni pineqartuni sulisussaasut. Sulisitsisunili ilaasortat taamatut tunngavilersuuteqartoqarneranut isumaqataanngillat.

Nikoline Ziemerip Siumumeersup aallarniutigalugu oqaatigaa, sulisitsisut najugaqavissunik sulisoqarnissamut taarsiullugu avataanit sualiussanik tikisitsisarnertik ”ileqquliutiinnarsimagaat”.

Taamatut oqaaseqarmat Nuummi Café Pascuccimik aamma Café Esmeraldamik piginnittoq Krissie Berthelsen qisuariarpoq.

- Taamatut oqaaseqartoqarnera ajuallaatigilaarpara, taanna oqarpoq.

Asuli tikisitsisoqartanngitsoq

Cafenik piginnittup oqaatigaa, suliffeqarfippassuarni assigiinngitsuni sulisussanik nunanit allaneersunik asuli tikisitsisoqarneq ajortoq, tikisitsisarnermi akisoorujussuummat aamma sullitat nammineq oqaatsit atorlugit sullinneqarsinnaannginnerat nuannersuunngimmat. Tamannalu ilungersuartupilussuusartoq, taanna oqarpoq.

Tamannalu tunngavigalugu sukkanerusumik nunanit allanit sulisussarsiorsinnaaneq, politikkerit ukiuni arlalinni neriorsuutigisarsimasaat, sulili piviusunngortinneqanngitsoq oqallisigineqalerpoq. Susassaqarfik Danmarkimit suli oqartussaaffigineqartoq, qineqqusaartut arlallit tunngavilersuutigaat.

Krissie Berthelsenip arlaleriarluni politikkerinut apeqqutigaa:

- Inuusuttut sulisinnaanngitsut qanoq iliuuseqarfiginiarpisigit. Najugaqavissut marluk sapaatip akunnerani matumani soraarsittariaqarsimavagut, piffissaq eqqorlugu suliartorsinnaanngimmata.

Tamanna ajornartorsiutaasoq ilaasortat allat arlallit politikkerillu isumaqatigaat, qinigassanngortittut isumaqatigiillutik oqaatigisarpaat, ajornartorsiut aaqqiiffigineqassappat, innuttaasut ajunngitsup tungaanut ingerlasumik ineriartortinniarlugit, siusissupilussuarmik imaluunniit Meeqqat Atuarfinni atualernissaq sioqqullugu suliassaq aallartinneqartariaqartoq.

Partiit isumaat

Qinigassanngortittut tamarmik inuussutissarsiornermut isummatik pillugit saqqummiussinissamut, qineqqusaarnerup aallartinnerani minutsini tallimani periarfissinneqarput.

Mikisoq Pavia Kreutzmann, Nunatta Qitornai

Kalaallit Nunaata avataanit aningaasaliisussarsiorsinnaaneq qulakkeersinnaasariaqarpaa. Meeqqat Atuarfiata suliffeqarfiillu akornanni ataqatigiissitsisarneq pitsaanerusariaqarpoq. Aningaasaqarnikkut namminiilernissamut allatut eqqarsartarneq aningaasaliissuteqarnissarlu aqqutissaavoq.

Pele Broberg, Naleraq

Ingerlatseqatigiiffiit akileraarutaat affaannanngortinneqassaaq. Pisortat suliffeqarfiit qanoq ingerlanneqarnissaannut akuleruppallaaratik ineriartortitsinissamut pitsaanerpaanik tunngavissiisariaqarpu. Assersuutigalugu pisortat attartortitsisassanngillat. Tamannami aningaasarsiutigisinnaanngilarput. Namminersorlutik Oqartussat ingerlatseqatigiiffiutaat iluanaarutiminnik Namminersorlutik Oqartussanut tunniussiniarlutik tunisassiaminnik akisunaaralutik tunisisaarput.

Bjørk L. Kristensen, Demokraatit

Pisariaqanngitsumik allaffissortoqarunnaassaaq. Ingerlatseqatigiiffiit akileraarutaat appaqqillugu 20 procentinngortinneqassaaq. Suliffeqarfinnut toqqaannanngitsumik tapiissutaasartut allanngortinneqartussat atorunnaarsinneqartussalluunniit qulaajaaffiginiarlugit misissueqqissaartoqassaaq. Suliffeqarfiit pisortat tapiissuteqartarnerisigut attatiinnarneqassanngillat. Innovation Greenland nukittorsarneqassaaq aamma aallarnisaasarneq meeqqat atuarfianni ilinniartitsissutaasalissaaq.

Sofus Fenger Hove, Suleqatigiissitsisut

Kalaallit Nunaanni suliffeqarfiit namminersortut ikippallaaqaat aamma allaffissortoqarpallaaqaaq. Soraarnerussutisiassaqarpoq, inummut paasissutissat pillugit malittarisassaqarpoq, aamma suliffeqarfiit pinngitsaalillugnik ilinniartunik isumaginnittuutittarpavut. Isumaginninneq pisortat isumagisussaavaat. Sulisussat amigaatineqartut tikisinneqarnissaat pisariaqartinneqarpoq aamma inuit sulinissamut piareersimatinniarlugit meeqqat atuarfiat kivinneqartariaqarpoq. Nungusaataanngitsumik aalisarneq.

Edvard Geisler, Atassut

Nuna nammineesinnaasoq pinnagu inuk nammineersinnaasoq pivarput. Nunami maani suliarinnillunilu pitsanngorsaasoqartassaaq. Inuussutissalerinermut oqartussaaffik siulliit ilaattut angerlaanneqassaaq. Oqartussaaffiit tamarmik sulisussanik amigaateqarput, inuit ullaakkut makinnissartik ilikkarsimannginnamikku imaluunniit ernguttarneq pissutigalugu suliffimmik paarsisinnaannginnamik. Avataanit tikisillugit sulisut ajattorneqassanngillat. Susaqarani namminersulivittoqarsinnaanngilaq, inuit nammineersinnaasut pilerseqqaartariaqarpavut.

Kuno Fencker aamma Nikoline Ziemer, Siumut

Pilersuisarneq pitsaanerulersinneqassaaq. Aallarnisaasut taperserneqartassapput aamma akitsuuseeriaaseq misissorneqassaaq. Namminersorlutik Oqartussat ingerlatseqatigiiffiutaat allatut aaqqissuunneqassapput, soorlu ingerlatseqatigiinngortillugit, aamma aningaasaatit ilisimasallu ataatsimut katersorneqassapput. Aatsitassarsiorneq ineriartortinneqassaaq aamma aningaasaqarneq pitsaanerulersinneqarlunilu innuttaasut amerlanerulersinneqassapput. Aalisarnermi inuttat tamakkiisumik kalaaliussapput.

Naja Nathanielsen, Inuit Ataqatigiit

Suliffeqarfinnut pisortanit pigineqartunut ikiorsiissuteqartarneq ammanerulissaaq. Politkkerit qitiusumit aqutsinatik atugassarititaasunik pilersitsissapput. Kimik atorfinitsisisoqarnersoq imaluunniit kikkut siulersuisuni issiassanersut pineqartillugit politikkerit immikkut inuiaassuseqarnermut akulerutissanngillat Nunamut isertitat annerulersissavavut aamma ilinniagallit amerlanerulissapput. Aningaasaqarnikkulli ineriartussagutta sulieqatissanik tikisitsisariqarpugut aningaasaliissuteqartariaqarlutalu.