Sulisitsisut qamittoorneq pillugu: Neriuppugut ilinniutaassasoq
Nuummi qamittoortoqarnera misissoqqissaarneqartariaqarpoq, Sulisitsisullu kattuffiata pilersuinerup isumannaatsuunissaata pitsanngorsarneqarnissaa qulakkeerneqarnissaalu ukkatarineqarnissaa piumasaraa. Sulisartullu kattuffiat SIK taamatut aamma oqariartuuteqarpoq.
Sapaatip-akunnerata siuliani Nuummi annertuumik qamittoortoqarnera illoqarfiit pingaarnersaanni suliffeqarfippassuarnut aningaasatigut kinguneqarpoq. Pisianiarfiit arlallit nerisassat nioqqutissat aassimasut igiinnartariaqarsimavaat, Nuummilu inissianik sanaartortorpassuit ullualunni sanaartorfissaminnik annaasaqarfigaat, akunnittarfiit neriniartarfiillu igaffimmi it-nilu atortunut innaallagiamik amigaateqarsimapput.
Sulisitsisuni (GE) pisortap pilersuinermi ajornartorsiutit politikkikkut sammineqarnissaat neriuutigaa – minnerunngitsumik sapaatip-akunnerani kingullermi pisut misissoqqissaarneqartariaqartut, ilikkagaqarnissamullu taakku tunngaviliisinnaassasut:
- Pisuni taamaattuni ajutoornermi upalungaarsimanerit pisariaqartut ersarissisarput. Pilersaarut A aamma pilersaarut B immaqalu pilersaarummut B-mut piareersimasussamik peqartariaqarpugut, Christian Keldsen, Sulisitsisuni pisortaq oqarpoq, nangillunilu:
- Ajornartorsiutit sunik pissuteqarnersut ilisimanngilakka, kisianni soorunami akunnerni taama amerlatigisuni innaallagiaqannginnatta kinguneqartitsivoq. Innaallagiaqaleqqinnera qujanarpoq, kisianni tamanna ilinniarfigineqassanngippat pitsaassanngilaq.
SIK: Neriuppunga juullikkunni ikumaannassasut
Nunatsinni kattuffiit annersaanni SIK-mi ilaasortanit innaallagiaarunnerup kingunerisaanik isertitanik annaasaqarneq pillugu nalunaaruteqartoqanngilaq.
Siulittaasoq Jess G. Berthelsen taama oqaluttuarpoq. Pilersuinerup maanna aaqqinneqarsimanissaa neriuutigaa:
- Kabelit qaqugorsuarmut atasinnaanngillat, kisianni sarfaaruttoorneq taama sivisutigisariaqanngilaq.
- Ilinniarfigineqassaaq, maannalu juullikkunni sarfaqaannarnissaa neriuutigaara, Jess G. Berthelsen oqarpoq.
Qamittoornerit sivisuut sungiusimaneqanngitsut
Sulisitsisuni pisortap sarfamik pilersuisoqaleqqinnissaanut suliaqartoqarnera nersualaarpaa. Sivikinnerusumilli qamittoortoqartarneranut sungiusimaneqartut taassuma oqaatigaa, ukiorpassuarnilu taama sivisutigisumik qamittoorneqarsimanngilaq. Sulisitsisut malitseqartitsisoqarnersoq aaqqiissutinillu nassaartoqarnersoq maluginiarpaat:
- Tassunga atatillugu politikkikkut nukissiuteqarnermut aningaasaliisoqarnissaa maluginiarneqartoq, aamma kinguleruttoqarnera maluginiarneqartoq, aningaasanut inatsimmi allaqqasoq takusinnaavara.
- Aningaasanut inatsimmi allassimasoq iliuuseqarfiginerusariaqassanersoq apeqqutaavoq. Tunngaviusumik attaveqaatitta atorsinnaajunnaarnerat ingasappoq, Christian Keldsen oqarpoq.
Kalaallit Nunaat nunat allaat assigalugit digitalinngorsaaffiusoq maluginiaqquaa, taamaalillunilu aamma innaallagissamik pisariaqartitsiartuinnartoq.
Aaqqissugaanikkut ajornartorsiutaasinnaasut iluarsineqassapput
- Innaallagiaqannginnerani akunnerit ingerlatillugit assersuutigalugu suliffeqarfinnut igitsisariariaqartunut aningaasaqarnermut sunniuteqarpoq. Suliffeqarfinni siunnersuinermik kiffartuussinermillu suliaqartuni aamma taamaappoq – akunneq ataaseq ingerlareerpat, akunnermi ataatsimi sullissineq tunineqarsinnaajunnaartarpoq. Taamatullu aamma nioqqutissaq ajortikkaanga tunineqarsinnaajunnaartarpoq, Christian Keldsen oqarpoq, nangillunilu:
- Nukissiuteqarfitsinnut tunngatillugu aaqqissuussaanermut tunngappat, taava misissorneqarnissaa pingaaruteqarpoq. Uanga nammineq juullip ulloriaanik qaminngatitsisinnaavunga – kisianni suliffeqarfiit ingerlassinnaanngikkutsigit, taava aningaasaqarnermut ajornartorsiortitsilissaaq.