Sulisitsisut mianersoqqutigaat: Aningaasaqarnikkut ingerlatat unittooratarsinnaanerat pimoorullugu eqqumaffigineqartariaqarpoq
Politikkerit piffissanut pissakilliorfiunerusussanut illikartitsillutik oqimaaqatigiissumik aningaasanut inatsisiliunngippata nunap aningaasaqarnikkut inissisimanerata ajorseriarsinnaanera, soorlu aamma siunissami atugarissaartuunissap ulorianartorsiortinneqarsinnaanera Sulisitsisut siulittaasuata Henrik Lethip ernumassutigivai.
2020-mut aningaasanut inatsisissatut siunnersuut naammassineqangajalerpoq - Sulisitsisulli mianersoqqusilereerput.
Aviisi Sermitsiaq taama allappoq.
Aningaasat qanoq atorneqarnissaanut siunnersuutit takkussuutilereersimapput.
Sulisitsisut siulersuisunut siulittaasup Henrik Lethip maanna eqqaassutigivaa aningaasanik illikartitsisoqartariaqartoq, piffissat pissakilliorfiunerusussat sillimaffigineqarnissaat eqqarsaatigiinnarnagu aammali kinguaariaat nunamik nunallu soqutigisaanik ingerlatsinissamut tunngavissaqarluartariaqartut siunissami ajunngitsumik atugaqarnissaat qulakkeerniarlugu.
- Kalaallit Nunaanni inuussutissarsiorneq mianernartuuvoq, akigititat pitsaasut, soorlu kinguppannut akigititat, pinngitsoorsinnaanngilluinnarpavut. Siorna 1,2 milliarder kr.-t missaanniittunik tunniussivugut, tamatumunngali peqatigitillugu takusinnaavarput aningaasat maannakkut aaqqiissutaagallartussaannarnut politikkerinit atorneqartartut, tassa piffissaq ungasinnerusoq eqqarsaatigalugu piviusorsiortumillu aaqqissuusseqqinnermut atornagit, Henrik Leth Sermitsiamut erseqqissaavoq.
Sulisitsisut ernumassutaat pillugit aviisimi Sermitsiami nutaami saqqummersumi paasisaqarnerusinnaavutit, uani ataani linki aqqutigalugu aviisimut isissutissarsisinnaavutit: