'Nunatsinnut iluaqutissat'
Sulisitsisut Kattuffiat: Namminiilivinnissaq ungasippoq
- Aatsitassat siunissami qanoq sunniuteqarnissaani piviusorsiortumik isiginneriaaseqarluni nalunaarusiap toqqammaveqarnera oqiliallaataaqaaq, Sulisitsisut Kattuffiata pisortaa oqarpoq
- Kalaallit Nunaata unammilligassat annertoqisut ornitai isigalugit ukiuni kingullerni nalunaarusiat pingaaruteqartut saqqummiunneqartarput, tamatumani inuiaqatigiit aningaasaqarnikkut imminut napatikkiartornerulernissaani inerisarneqarnissaanilu politikkikkut qanoq pingaarnersiuisoqartariaqarnersoq saqqummiunneqartarluni. Aatsaalli piffissaq taama eqqorluartigalugu saqqummersitsisoqarpoq nalunaarusiaq 'Kalaallit Nunaanut iluaqutissaaqqullugu' tamanut saqqummiunneqaqqammersoq. Nunagisap aningaasaqarneranut aatsitassanik ingerlatsilernissap ingasattajaarussamik naliliisoqarnissaa ilaatigut mianersoqqussutigineqarpoq.
Nalunaarusiaq 'Kalaallit Nunaanut iluaqutissaq' januaarip 24-ani saqqummertoq pillugu Sulisitsisut Kattuffiata pisortaa Brian Buus Pedersen oqarpoq.
'Kalaallit Nunaanut iluaqutissaaqqullugu' nalunaarusiaq Kalaallit Nunaanni pinngortitap pisuussutaasa uumaatsut iluaqutaasinnaanngorlugit atorluarneqarnissaannik siunertaqarluni ataatsimiititaliamit suliarineqarpoq. Immikkut ilisimasallit ataatsimiititaliamiipput, Ilisimatusarfiup aammalu Københavns Universitetip pilersitaa, ataatsimiititaliami immikkut ilisimasallit toqqarneqarsimallutik ilaatigut aningaasaqarnikkut, inatsisilerinikkut aammalu pilersaarusiornikkut immikkut ilisimasallit. Ataatsimiititaliap siulittaasorivaa geologimi professori Minik Rosing.
- Aatsitassat siunissami qanoq sunniuteqarnissaani piviusorsiortumik isiginneriaaseqarluni nalunaarusiap toqqammaveqarnera oqiliallaataaqaaq, tamatumalu piaartumik namminersulivinnissamik oqallinnerni timmeralaarunnaarsitsinissamik nunamullu tunnganerulluni oqallinnissamut iluaqutissaasorinarpoq, Sulisitsisut Kattuffianni pisorta Brian Buus Pedersen oqarpoq.
- Tamanna piffissami sivisuumi pisariaqartinneqarsimavoq illuatungilertariaqarmata sinnattuaqinerit tuaviuussat orpippassuarnik guldnillu imaaginnavissunik sinnattuaqinernik imallit aammalu sukkasuumik uissuumminaannartumik pisoorsuanngoriasaarnissamut aqqutissat qaqeriataarfissat sinnattuaqiutiginerini. Nalunaarusiarlu ersarilluinnartumik oqarpoq: Inerisarneqarnissamut aqqut atugarissaarnissamullu inuiaqatigiinni tamatigoortumik pikkorissaaqqinnikkut anguneqassaaq, suliffeqarfinni aammalu sulisorisani pikkorissaaqqinnikkut aammalu minnerunngitsumik pingaaruteqaqisoq pisortaqarfinni ingerlatsiviit ilanngullugit, Brian Buus Pedersen oqarpoq.
- Allatut oqaatigalugu aaqqissuusseqqinnerit amerlasuut pisariaqartinneqartullug ingerlanneqartariaqarput kalaallit inuiaqatigiit aningaasaqarnikkut inuuginnassagunik. Aatsitassaqarfiit olie-tillu pineqaraluarpata imaluunniit pineqanngikkaluarpat, Sulisitsisut Kattuffianni siulittaasoq oqarpoq.