Sulisitsisut atuarfik pillugu: Meerartavut siunissarissaarnerunissaminnut periarfissaqartariaqarput
Nunatsinni sulisitsisut 62 procentii suliassaminnut naleqquttumik ilinniarsimasunik sulisussameerput. Pissutsit taamaannerat allanngortinniarniarlugu ajornartorsiutaasut pillugit Sulisitsisut iliuuseqalerput maannalu meeqqat siunissaat pillugu isumaqatissarsiulerlutik.
Misissuinerpassuit nalunaaruterpassuillu aqqutigalugit naqissuserneqartuarpoq, meeqqat amerlavallaartut meeqqat atuarfiannit naammassinnereerlutik ilinnialernissaminnut piginnaasamikkut inuuttoortartut. Assersuutit ajornartorsiummut ersersitsinerpaat ullumikkut tassaapput inuusuttut 2.500-it sinnerlugit amerlassusillit aaqqissuussaanerup avataaniinnerat. Ilinniartuunngillat aamma suliffissarsiortutut nalunaarsorneqarsimanngillat taamaammallu suliffeqanngitsutulli allatut inuussutissaminnik pisortanit ikiorserneqaratik, Sermitsiaq allappoq.
Meeqqat atuarfianni angusat pitsaannginneri pillugit oqallittoqaleraangat, amerlasuutigut politikerit allallu oqallinnermi peqataasut oqaatigisaannarpaat meerartavut nunatta siunissarigai, taamaattorli aamma amerlasuutigut qisuariaatigineqartarput ”meeqqat atuarfiat ajoquteqarsimassaaq” aamma ”angajoqqaat meeqqatik atuartut malinnaaffiginngippallaarpaat.”
Maannali nunatsinni sulisitsisut suliniuteqalernerminni isumaqatissarsiornerminnilu pisuutitassarsioratik tikkuartugassarsioratillu suleqatissarsiorput meeqqat atuarnerminni piginnaasaasa qaffassarneqarnissaat anguniarlugu, isumaqatissarsiornermilu qitiuvoq atuarfinni aqutsisut aamma ilinniartitsisut tapersersorneqarluassasut, taamaaliornikkummi meeqqat angusarissaarsimallutik atuarfimmik naammassinnittarnerat qulakkeerneqarnerusinnaasoq sulisitsisut isumaqarput.
Sulisitsisut aaqqiissutaasinnaasutut tikkuagaat sisamat ukuupput:
- Atuarfiit tamarmik piginnaasaqarluartunik tamatigoortunillu aqutsisoqassapput
- Atuartitsineq atuagarsornikkut qaffasissumik inissisimatinneqassaaq
- Meeqqat atuartut tamarmik nutaaliaasunik atuarfeqartinneqassapput
- Atuartitseriaaseq piginnaasanut agguaassiviusoq atuutsinneqalissaaq
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: