Sulisitsisut assartuinermut akigititat qaffannerat pillugu: RAL-ip inuussutissarsiornerup aaqqissugaanera aquppaa
Royal Arctic Linep avammut tunisat assartorneqarnerinut akigititanik qaffaanera Sulisitsisuni pisortap kissaammernaraa. Inuussutissarsiummut nunap avammut niuernerata 95 procentianik suliaqarfiusumut alloriarneq navianartortaqarpoq, taanna oqarpoq.
Inuussutissarsiornerup aaqqissugaanerata attaveqarneq aquttussaagaluarpaa, maanna akerlianik pisoqarpoq. Royal Arctic Linep avammut tunisanut assartuinermut akinik 32 procentinik qaffaalluni nalunaaruteqarneranut Sulisitsisuni pisortaq Christian Keldsen taama qisuariarpoq.
- RAL-ip aningaasanik amigaateqarnera malillugu akinik qaffaasoqarnissaa politikerit akueraat. Taava nalinginik qummut nikisitsisoqarpoq. Umiarsuaatileqatigiiffiit aningaasat allamit nassaariniarlugit taamatut iliuuseqartariaqarnerannik kinguneqassaaq, nunarsuarmi niuerfimmi unammilleqatigiiffiusumi suliaqarnertik pissutigalugu, aningaasartuutit tunisat akianut inissinneqarsinnaanngimmat.
Royal Greenlandip aalisartut tunisineranni akigititat taamaallaat nikisissinnaassallugit nalunaarutigereerpaa.
Akissarsiatigut malugineqassasoq
Kilisaatini sulisunut akissarsiatigut aamma malugineqassaaq. Kilisaataatileqatigiiffiimmi sulisunut akissarsititsinnginnerminni nassiussinermut aki ilanngaatigeqqaartarpaat. Aalisarnermillu inuussutissarsiortut assartuinermi allamik toqqagassaqanngillat, pisortaq oqarpoq.
- Attaveqaatit inuussutissarsiornerup aaqqissuussaaneranik aqutsinissaat ilungersunarluinnartutut isigaarput, tamanna killormoortussaagaluarpoq.
Nunatsinni kilisaataatileqatigiiffiit nunanut tamalaanut aalisagarpassuarnik qalerualinnillu avammut tunisisartut, nioqqutit nunani tamalaani tunineqartarmata niuerfimmi atukkat malillugit sulisariaqartut, taassuma oqaatigaa.
- Nunarsuarmi avammut tunisinerup tuniniaanerullu qanoq ingerlanissaa Kalaallit Nunaata aqussinnaanngilaa. Uppernarsaatitaqanngitsumik tunngaveqarluni uani nalorninartumik iliuuseqartoqarpoq.
Akit qaffanneqarnissaannik akuersisoqarnera pillugu ineqarnermut attaveqarnermullu naalakkersuisup Erik Jensenip oqaaseqarneranut, pisortaq innersuussivoq.
Uppernarsaammik takorusuttoq
Ingerlatseqatigiiffiit akit qaffanneqarnerinik eqqorneqartut aningaasaqarnerat pitsaasuusoq, Erik Jensen ilaatigut oqarpoq, taakkulu assartuinermut aningaasartuutit qaffattut nammassinnaagaat. Umiarsuaatileqatigiiffiillu nioqqutit avammut tunineqannginnerini suliarineqartarnerannik annertunerulersitsinissamut piumassuseqalersitsisinnaasoq, aamma taanna isumaqarpoq.
- Taamatut oqariartuuteqarnermut uppernarsaatinik takunissara qilanaaraara, tassami oqaatigisai pillugit naatsorsuusiortoqarsimassaaq, Christian Keldsen isumaqarpoq.
Periuserineqartullu siunertaa malillugu iluatsikkumaarnersoq taassuma qularaa.
- Akinik aaqqiineq avammut niuernermik inuussutissarsiutitsinnut qanoq niuernerminnik ingerlatsinissamik politikkikkut aaqqiissuteqarfigineqarniarnera immaqa aqqutissaanngilaq. Taarsiullugu pissutsit pitsaasumik oqaloqatigiissutiginissaat kissaatigineqarsinnaavoq. Politikerit ataatsimeeqatiginissaat aamma periusissamik inuussutissarsiornermut iluaqutaasussamik suliaqartoqarnissaat qinnuiginnissutigissavarput, Christian Keldsen oqarpoq.