Aningaasanut inatsit
Sulisitsisut: Aningaasanik aqutsineq ernumanartoq
Sulisitsisut pisortaat ineriartornermik ernummateqarpoq
Ukiup aallartinnerani 2015-imut aningaasanut inatsit piareersarneqalermat 2014-2018-imut ataatsimoortumik 22 millioner koruuninik sinneqartooruteqartoqarnissaa naatsorsuutigineqarsimavoq.
Aningaasaqarnermut naalakkersuisup aningaasanut inatsisissaq 2016-imoortoq sapaatip akunnerani matumani saqqummiuppaa, piffissanilu taakkunani taaneqareertuni 388 millioner koruuninik amigartoortoqarnissaa saqqummiunneqarpoq, tassa 2014-imiit 2018-imut, kiisalu 2014- imut kisitsisit iluarsisat ilanngullugit.
410 millioner koruunit assigiinngissutaapput. Tamannalu Sulisitsisut pisortaata Brian Buus Pedersenip ernummatigaa.
- Kisitsisit qaammatialuit qaangiunneranni allanngorujussuarnerisa takutippaat aningaasaqarnermik aningaasanillu missingersuutinik aqutsinissamik pisariaqartitsisoqartoq. Piffissami taama sivikitsigisumi naliliinerup aningaasanik 400 millioner koruuninik allanngortinneqarnissaa iluaqutaanngilaq naak taakku aamma amigartoornernik 2014-imeersunik 222 millionit koruuninik ilaqaraluartut, Brian Buus Pedersen oqarpoq.
- Aningaasanut inatsisit nutaaq 2019-imi 103 millioner koruuninik sinneqartoorutaasussaagaluartoq aaqqissuusseqqinnernik pinngitsuuisinnaannginnitsinnik takutitsivoq, naak aningaasaqarnerup aqunnissaata qanoq imaqarneranik ilisimasaqarpianngikkaluartugut.
Allaaserineqartoq Sermitsiami aamma atuarneqarsinnaavoq. Aviisi ataani pisiariuk: