Sulisitsisut aamma SIK: Nunani allamiut sulisartut ilaat akilutsinneqarput
Nunani allamiut sulisartut Nunatsinni sulisinneqartut torersumik iliorfigineqassapput aamma nunatsinni sulinermi atugassaritinneqartut allat asserluinnaannik atugassaqartillugit sulisorineqassapput, Sulisitsisut aamma SIK isumaqarput
- Ajoraluartumik assersuutissarpassuaqarpoq suliffeqarfiit ilaanni sulisorineqartut atornerlunneqartarnerinik, nalunaaquttap akunneri 12-13-nit ataannartumik sulisinneqartartunik, isumaqatigiissutillu ataaterujussuarlugit akissarsiaqartinneqartartunik, qaangiuttoornersiaqartinneqartanngitsunik aamma sapaammi nalliuttunilu sulisinneqaraluarunik immikkut tapisiaqartinneqartanngitsunik, kiisalu soraarnerussutisiassaqartinneqartanngitsunik.
Sulisitsisuni pisortaq Brian Buus Pedersen aamma SIK-mi siulittaasoq Jess G. Berthelsen tusagassiutinut nalunaaruteqarput.
Akilutsitineq
- Tamanna akuerineqarsinnaanngivippoq, SIK aamma Sulisitsut isumaqarput.
Taamaasiorneq inunnik atornerluilluni akilernerluineruvoq, sulisartut akissarsiaannik sulinermullu atugarisaannut ajornartorsiortitsilersoq tikkuarneqarpoq
- Suliffissaqartitsinermilu suliffeqarfinnik isumaqatigiissutit najoqqutaralugit akilersuisartunik sanngiillisitsisoq. Inunnik atornerluilluni akikinaaraluni sulisitsineruvoq, sulisartut nunani allamiut nunatsinni suliakkersorneqaleraangata, kalaallinit appasinnerujussuarmik akissarsiaqartillugit, suliffimmilu atugarisaannik ajornerusumik atugassaqartillugit.
Unammilleqatigiinnermut eqquisoq
Nunani allammiut appasinnerusumik akissarsiaqartillugit ajornerusunillu atugaqartillugit Nunatsinni atorfinitsinneqaraangata, atorfeqartunut akilerlunneqartunut ajornartorsiummik pilersitsisartoq oqarput.
- Aamma atorfeqareersunut, isumaqatigiissutit najoqqutaralugit atorfeqartinneqartunut, ajornartorsiortitsilersarpoq – tassami suliassaralui nunanit allamiunit akilernerlutanit suliarineqalertarmata. Aamma suliffeqarfinnut, malittarisassat, isumaqatigiissutit aamma naliginnaasumik ileqqorissaarneq najoqqutaralugit atorfinitsitsisartunut tamanna ajornartorsiortitsilersarpoq. Pissusissarinngisamik eqqungasumillu sakkortuumik unammillerneqalertaramik. Kiisalu Nunatsinni sulisoqarniarneq sulisartunit nunanit allamiunit akilernerlutanit eqqorneqarsinnaavoq, kalaallit sulisartut soraarsitaajortulersinnaammata.
Isumaqatigiissutit najoqqutarineqartariaqartut
SIK aamma Sulisitsisut isumaqarput, suliassat Nunatsinni suliarineqartussat, nunatsinni akissarsianut atorfinitsinneqarnermilu isumaqatigiissutit najoqqutaralugit ingerlanneqartariaqartut.
- Kattuffiilli taakku aamma erseqissarpaat, sulisartunik nunanit allamiunik sulisoqartariaqarneq paasinarlunilu pisariaqartoq, sulisussanik nunatsinni pissarsisoqarsinnaanngikkaagat, tamakkuli isumaqatigiissutit akuerineqarsinnaasut atorlugit atorfinitsinneqartariaqartut, Brian Buus Pedersen aamma Jess G. Berthelsen oqarput.